'अजिंक्य'चा दमदार ट्रेलर प्रेक्षकांच्या भेटीला

चित्रपटाच्या ट्रेलरमध्ये अजिंक्यच्या भूमिकेत असलेला भूषण प्रधानचा "कॉर्पोरेट लूक" सर्वांचे लक्ष वेधून घेतो, त्यासोबत असलेली प्रार्थना तितकीच सुंदर आणि सोज्वळ दिसते.

अभिनेता भूषण प्रधान तसेच अभिनेत्री प्रार्थना बेहरे चित्रित नव्या धाटणीचा चित्रपट "अजिंक्य"चा दमदार ट्रेलर प्रेक्षकांच्या भेटीला आला आहे. "अजिंक्य” सिनेमा येत्या १९ नोव्हेंबर रोजी चित्रपटगृहात प्रदर्शित होणार असून हा संपुर्ण चित्रपट ग्रामीण आणि शहरी भागांत सातत्याने दिसत असलेल्या आर्थिक परिस्थिती वर भाष्य करणारा चित्रपट आहे. आधुनिकतेच्या आणि प्रगतीच्या वेगवान प्रवाहात स्वार असणाऱ्या आजच्या पिढीचं प्रतिनिधित्व करणारा नायक ''अजिंक्य''च्या संघर्षावर बेतलेला हा सिनेमा आहे. 

चित्रपटाच्या ट्रेलरमध्ये अजिंक्यच्या भूमिकेत असलेला भूषण प्रधानचा "कॉर्पोरेट लूक" सर्वांचे लक्ष वेधून घेतो, त्यासोबत असलेली प्रार्थना तितकीच सुंदर आणि सोज्वळ दिसते. या सिनेमात जेष्ट अभिनेते उदय टिकेकर, अरुण नलावडे, गणेश यादव, अनिकेत केळकर, प्रसाद जवादे, पद्मनाभ बिंब, त्रियुग मंत्री अभिनेत्री वंदना वाकनीस आणि पल्लवी पाटील यांच्या प्रमुख भूमिका आहेत. या सिनेमाचं दिग्दर्शन अ. कदिर यांनी केलं आहे तसेच चित्रपटाची कथा, पटकथा, संवाददेखील अ. कदिर यांचे असून अ. कदिर यांचा हा त्यांचा पहिलाच सिनेमा आहे.

रोहन- रोहन यांनी दिलेल्या संगीताने या चित्रपटाची शोभा वाढली आहे. "अलगद अलगद", "स्वप्नांना", "आता तरी बोल ना" आणि "फेव्हरेट राव" या गाण्यांना चाहतेवर्गाकडून पसंती मिळत आहे.भूषण प्रधान आणि प्रार्थना बेहरे या दोघांनाही चित्रपटगृहात पाहणे हे प्रेक्षकांसाठी एक आनंदाची बाब असेल. येत्या १९ नोव्हेंबर २०२१ रोजी संपूर्ण महाराष्ट्रभरात चित्रपट प्रदर्शित होत आहे.