त्यांनी तोंड काळं करून घेतले; वर्षा बंगल्यावरील मजकूरावरून संजय राऊतांची टीका

'युटी वाईट आहेत' अशा प्रकारचे वादग्रस्त लिखाण लहान मुलाच्या हस्ताक्षरात लिहिलेले आढळले आहे.

मुंबई : मुख्यमंत्रीपदावरून बिनसलेल्या भाजपा-शिवसेनेतील मतभेदांनी आता वर्षा बंगल्याच्या भींतीही रंगू लागल्या असून 'युटी वाईट आहेत' अशा प्रकारचे वादग्रस्त लिखाण लहान मुलाच्या हस्ताक्षरात लिहिलेले आढळले आहे. यावरून आज वातावरण तापले असून याला राजकीय रंग देण्यात येत आहे. या कृत्याचा शिवसेनेचे खासदार संजय राऊत यांनी निषेध व्यक्त केला आहे. 

वर्षा बंगल्यावर जे काही लिहिले आहे ते मी पाहिलेले नाही. कधी वर्षा बंगल्यावर गेलो नाहीय. अशा प्रकारचे मजकूर रंग मारून मिटविता येतात. पण हे ज्याने कोणी केले आहे त्यांच तोंड काळं  झालं आहे, अशी टीका राऊत यांनी देवेंद्र फडणवीस यांचे नाव न घेता केली. 

तर हा उद्धव ठाकरेंचा द्वेष करणारा मजकूर फडणवीसांची मुलगी दिविजाने लिहिल्याची चर्चा होत आहे. यावर विरोधी पक्षनेते देवेंद्र फडणवीस यांनी प्रतिक्रिया देताना, मी बंगला सोडताना कोपरा कोपरा पाहिलेला आहे. यामुळे तिने असे केलेले नाही, असे म्हटले आहे. तसेच हे आपल्याविरोधातील षड्यंत्र असल्याचा आरोप केला आहे. तिथे स्टाफही राहतो. त्यांच्या खेळणाऱ्या मुलांपैकी कोणीतरी केले असेल.

तर अमृता फडणवीस यांनी यावर खुलासा करताना आम्ही महिन्य़ापूर्वीच वर्षा बंगला सोडला आहे. बंगला सोडताना सगळं तपासलेले होते. त्यानंतर एकदाही तिथे गेलेलो नाही. हे लिखाण दिविजा किंवा अन्य कोणी केलेले नाही, असे म्हटले आहे.