आता कुणा 'दादा', 'काका'ला घाबरायचं कारण नाही; काकडेंची 'पवार'बाज फटकेबाजी

2022 होणाऱ्या महापालिकेच्या निवडणुकीत सर्वांना एकत्र घेऊन 95 ते 100 नगरसेवक निवडून येतील.

पुणे: भाजपा पुणे शहर अध्यक्षपदी माजी आमदार जगदीश मुळीक यांची निवड करण्यात आली आहे. यावेळी आयोजित भाजपच्या मेळाव्यात खासदार संजय काकडे, गिरीश बापट आणि चंद्रकांत पाटील यांनी ही उपस्थिती दर्शवली होती. या मेळाव्यामधील भाषणात राज्यातले सरकार हे अपघाती सरकार आहे. मात्र दिल्लीत भाजपची सत्ता आहे, शहरात भाजपची सत्ता आहे, तेव्हा कुणीही चिंता करू नका. कुणी दादा, काका नाना मामा काही करू शकणार नाही म्हणून आता घाबरण्याचं कारण नसल्याचे सांगत राज्यसभा खासदार संजय काकडे यांनी अप्रत्यक्षपणे उपमुख्यमंत्री अजित पवार आणि राष्ट्रवादी काँग्रेसचे अध्यक्ष शरद पवार यांना टोला लगावला आहे. 

आपले ध्येय 2022 होणाऱ्या महापालिकेच्या निवडणूका आहेत. या निवडणुकीत सर्वांना एकत्र घेऊन 95 ते 100 नगरसेवक निवडून येतील. माझा कार्यकर्त्यांवर विश्वास असून पक्षाची पुनर्बांधणी करू असं संजय काकडे यांनी सांगितले. तसेच पक्षाच्या चांगल्या कामाला तडा देण्याचे काम काहीजण करत आहे.  राज्यातले सगळेजण एकत्र येऊन आपल्याला संपविण्याचे काम करत आहेत. पुण्यातदेखील एकजुटीने काम करण्याची गरज असल्याचे मत भाजपाचे नेते चंद्रकांत पाटील यांनी व्यक्त केले आहे.

शहर भाजपाच्या या कार्यक्रमात माजी आमदार जगदीश मुळीक यांची शहराध्यक्षपदी निवड करण्यात आली. यावेळी व्यासपीठावर प्रदेशाध्यक्ष चंद्रकांत पाटील,खासदार गिरीश बापट, आमदार माधुरी मिसाळ आदींसह विविध नेते आणि कार्यकर्ते उपस्थित होते.