CoronaVirus:धक्कादायक ! ‘मला कोरोना झाला’ म्हणत तरूण बसला पोलीस अधिकाऱ्याच्या खुर्चीवर

लातूरच्या विवेकानंद पोलीस ठाण्यातील प्रकार

ठळक मुद्देपोलीस स्थानकातील संगणक आणि कॅबनची केली तोडफोड

लातूर : मला कोरोना झाला, असे म्हणत एक तरूण गुरूवारी सकाळी लातूरच्या विवेकानंद पोलीस ठाण्यात शिरला़ काही क्षण पोलीसही दचकले़ तोपर्यंत त्या तरूणाने ठाण्यातील संगणक, केबिनच्या काचा फोडल्या अन् थेट सहाय्यक पोलीस निरीक्षकाच्या खुर्चीवर जाऊन बसला़ 

सदरील तरूणाचे मानसिक संतुलन ढळल्याचे पोलिसांनी सांगितले़ नेहमीप्रमाणे ठाण्यात कर्मचारी हजर होते़ त्याचवेळी अचानकपणे तरूण ठाण्यात शिरला़ पहिल्यांदा तो जोरात ओरडला़ मला कोरोना झाला आहे़, असे म्हणाला़ त्यामुळे पोलीस सावध भूमिका घेत दूर झाले़ तितक्यात त्याने मोडतोड सुरू केली़ थुंकूही लागला़ त्यामुळे पोलिसांनी निर्जंतुकीकरणाचा फवारा त्याच्या दिशेने मारला़ तोही त्याने उलथून टाकला़ कसेबसे त्याला नियंत्रणात आणून लातूरच्या सर्वोपचार रूग्णालयात दाखल करण्यात आले़

दरम्यान, त्या तरूणाविरूद्ध शासकीय कामात अडथळा केल्याचा तसेच आपत्ती व्यवस्थापन कायदा व साथरोग प्रतिबंधक कायद्याचा भंग केल्याप्रकरणी गुन्हा दाखल करण्यात आला आहे़ सध्या त्याच्यावर सर्वोपचार रूग्णालयातील मानसोपचार विभागात उपचार सुरू आहेत़