दुसऱ्या लग्नासाठी वरात घेऊन पोहोचला नवरदेव; तिथे उभी होती पहिली पत्नी, अन् मग...

तरुणानं खोटं बोलून ठरवलं दुसरं लग्न; तरुणीच्या घरी वरात घेऊन पोहोचला; तिथे होती पहिली पत्नी

गोरखपूर: उत्तर प्रदेशच्या गोरखपूरमध्ये एक धक्कादायक प्रकार घडला आहे. गुलरिहा पोलीस ठाण्याच्या हद्दीत येणाऱ्या एका गावात वास्तव्यास असलेला तरुण वरात घेऊन घरी पोहोचला. तिथे त्याची पहिली पत्नी मुलाला घेऊन त्याची वाट पाहत बसली होती. वरात घेऊन पोहोचलेल्या नवरदेवानं पहिल्या पत्नीला आणि मुलाला पाहताच पळ काढला. त्यानंतर ग्रामस्थांनी त्याला पकडून चांगलाच चोप देत पोलिसांच्या ताब्यात दिलं. पोलिसांनी आरोपी नवरदेवाविरोधात गुन्हा दाखल असून त्याची रवानगी तुरुंगात केली आहे.

खोराबार येथील सुबाबाजार परिसरात वास्तव्यास असलेल्या बबलूनं वर्षभरापूर्वी गुलरिहा पोलीस ठाण्याच्या हद्दीत येत असलेल्या एका गावातील तरुणीशी लग्न ठरवलं. त्यानंतर ५ डिसेंबरला रात्री साडे आठ वाजता तरुणीच्या घरी वरात पोहोचली. वऱ्हाडाचं स्वागत करण्यासाठी कुटुंबीय आणि नातेवाईक उपस्थित होते. 

तिथेच नवरदेवाची पहिली पत्नी ४ वर्षांच्या मुलासह वाट पाहात होती. पहिल्या पत्नीला पाहताच नवरा पळू लागला. स्वागताला पोहोचलेल्या मंडळींनी धाव घेत त्याला पकडलं. काही तरुणांनी नवरदेवाची धुलाई केली. यानंतर घटनेची माहिती पोलिसांना देण्यात आली. पोलिसांनी नवरदेवाला ताब्यात घेऊन चौकशी सुरू केली. बबलूनं ५ वर्षांपूर्वी आपल्यासोबत विवाह केला असून आम्हाला ४ वर्षांचा मुलगा असल्याचं तिनं पोलिसांना सांगितलं.

पती दुसऱ्या महिलेशी विवाह करणार असल्याची माहिती बाहेरुन समजताच शोधाशोध करत इथपर्यंत पोहोचल्याचं पहिल्या पत्नीनं सांगितलं. त्यानंतर आरोपी पोलिसांसमोर माफी मागू लागला. आरोपी तरुणानं वर्षभरापूर्वी खोटं सांगून लग्न नक्की केल्याचा आरोप वधूच्या आईनं केला. लग्नाच्या तयारीत साडे पाच लाख रुपयांचा खर्च झाल्याचं तिनं सांगितलं. यानंतर आरोपीविरोधात विविध कलमांखाली गुन्हे दाखल करण्यात आले. पोलिसांनी त्याची रवानगी कोठडीत केली आहे.