वडगाव लांबे शिवारात आढळले बिबट्याचे पिल्लू

चाळीसगाव शहरापासून ८ ते १० किमी अंतरावरील वडगाव लांबे शिवारात ऊसतोड मजुरांना बिबट्याची दोन पिल्लू आढळून आले.

ठळक मुद्देदोन दिवसानंतर आई आणि पिलाची झाली भेट दृश्य वनविभागाच्या ट्रॕप कॕमेऱ्यात कैद

लोकमत न्यूज नेटवर्क

चाळीसगाव : शहरापासून ८ ते १० किमी अंतरावरील वडगाव लांबे शिवारात ऊसतोड मजुरांना बिबट्याची दोन पिल्लू आढळून आले. मात्र काही तासांच्या अवधीनंतर एक पिल्लू मादी उचलून घेऊन गेली असावी, असा अंदाज आहे. दुसऱ्या पिलासही तिनेच दोन दिवसानंतर नेल्याचे वनविभागाने लावलेल्या ट्रॕप कॕमेऱ्यात मंगळवारी कैद झाले आहे, अशी माहिती चाळीसगाववनविभागाच्या वनपरिक्षेत्र अधिकारी शितल नगराळे यांनी ‘लोकमत’शी बोलताना दिली.

वडगाव लांबे शिवारात प्रकाश नीळकंठ पाटील यांच्या शेतात ऊसतोडणी सुरु असताना ऊसतोड मजुरांना सात रोजी बिबट्याचे दोन पिल्लू दिसून आले. वनविभागास याची खबर लागताच शितल नगराळे यांनी मानद वन्यजीव रक्षक राजेश ठोंबरे, विवेक देसाई यांच्यासह परिसराची पाहणी केली असता एकच पिल्लू आढळून आले. एक पिल्लू मादी घेऊन गेली असावी, असा प्राथमिक अंदाज आहे.

वनपाल जी. एस. पिंजारी, वनरक्षक एम. बी. चव्हाण, एस. एच. जाधव, वाय. के. देशमुख, आर. आर. पाटील, वनमजूर बाळू शितोळे, श्रीराम राजपूत, भटू अहिरे, संजय गायकवाड, राहुल मांडोळे यांनी यासाठी सहकार्य केले.

दुसरे पिल्लू नेल्याचे कॕमेऱ्यात कैद

आढळलेले पिल्लू सुरक्षितरित्या एका कॕरेटमध्ये ठेऊन दोन ठिकाणी वनविभागाने ट्रॕप कॕमेरे लावले. यावेळी कॕमेऱ्यात मादी पिल्लू असलेल्या कॕरेटच्या अवतीभोवती फिरत असल्याचे कैद झाले.

दुसऱ्या दिवशी हा परिसर निर्मनुष्य केला असता मंगळवारी सकाळी ट्रॕप कॕमेऱ्यांची तपासणी करण्यात आली. यात मादी असलेली आई आपल्या पिलास घेऊन जात असल्याचा प्रसंग कैद झाला आहे.

प्रसंगावधानता ठेऊन आम्ही परिसरात दोन ठिकाणी ट्रॕप कॕमेरे लावले. परिसर निर्मनुष्य केला. यामुळे दोन दिवसानंतर मादी असलेली व पिलाची भेट झाली. पिल्लू मादीच घेऊन जात असल्याचे दृष्य मंगळवारी कॕमेऱ्यात कैद झाले आहे.

- शितल नगराळे,

वनपरिक्षेत्र अधिकारी, चाळीसगाव वनविभाग.