आईस्क्रीमची गाडी चारवेळा उलटूनही चालक बचावला
By लोकमत न्यूज नेटवर्क | Published: April 8, 2021 11:51 PM2021-04-08T23:51:03+5:302021-04-08T23:51:22+5:30
आईस्क्रीम पोहोचवणारे चार चाकी वाहन वर्डी फाट्याजवळ चाक निखळल्याने चार ते पाच वेळा उलटले.
लोकमत न्यूज नेटवर्क
चोपडा : यावलकडून चोपडयाकडे आईस्क्रीम पोहोचवणारे चार चाकी वाहन वर्डी फाट्याजवळ चाक निखळल्याने चार ते पाच वेळा उलटले. यात चालक ओंकार यादव (रा. ज्योतपुर, राजस्थान) हा आश्चयर्यकारकरित्या बचावला आहे. गुरुवारी दुपारी १.३० वाजेच्या सुमारास यावल रोडवर ही घटना घडली.
चोपडा येथे आईस्क्रीमच्या दुकानासाठी आईस्क्रीम पोहोचवणारे चारचाकी वाहनाचे चाक अचानक तुटल्याने या वाहन चार ते पाच वेळा उलटले. मात्र त्यातील चालक हा बालंबाल बचावला. कोणत्याही प्रकारची जखम त्याला झाली नाही. अथवा मुका मारही त्यास लागला नाही. त्याच वेळेस चोपडा कडून जळगाव येथे जाणारे वेले तालुका चोपडा येथील उपसरपंच दीपक पाटील, अकुलखेडा येथील संदीप धनगर, वेले येथे ग्रामसेवक जनार्दन विसावे आणि माचले येथील माजी उपसरपंच हिरालाल पाटील हे या रस्त्याने जात होते. त्यांनी चालकाला बाहेर काढण्यास मदत केली. नंतर ते आपल्या कामासाठी मार्गस्थ झाले.