दोन दिवसांपासून शहराला लसच मिळेना
By लोकमत न्यूज नेटवर्क | Published: June 25, 2021 04:13 AM2021-06-25T04:13:44+5:302021-06-25T04:13:44+5:30
लोकमत न्यूज नेटवर्क जळगाव : दीड महिन्याच्या प्रतीक्षेनंतर सुरू झालेल्या १८ ते ४४ वर्षांवरील नागरिकांच्या लसीकरणाला पुन्हा एकदा ब्रेक ...
लोकमत न्यूज नेटवर्क
जळगाव : दीड महिन्याच्या प्रतीक्षेनंतर सुरू झालेल्या १८ ते ४४ वर्षांवरील नागरिकांच्या लसीकरणाला पुन्हा एकदा ब्रेक लागला असून, गेले दोन दिवसांपासून शहरातील लसीकरण केंद्र बंद होती ती पुन्हा लस नसल्याने शुक्रवारी बंद राहणार आहे. यात रोटरी भवनाच्या केंद्रावर कोव्हॅक्सिन हे दुसऱ्या डोससाठी उपलब्ध राहणार आहे.
जिल्ह्यातील एकूण लोकसंख्येच्या ३५ टक्के लोकसंख्या ही १८ ते ४४ वयोगटांची असून, याच वर्गाला गर्दीचा अधिक सामना करावा लागत असल्याने त्यांचे लसीकरण पूर्ण व्हावे, अशी मागणी सुरुवातीपासून असताना याच वयोगटाला नेमकी सर्वांत शेवटी लस मिळत आहे. मात्र, त्यातही या वयोगटाचे लसीकरण सुरू होताच, लसींचा तुटवडा समोर येत आहे. मंगळवारी या वयोगटाचे लसीकरण सुरू होताच शहरातील महापालिकेच्या केद्रांवर लस संपली. बुधवार व गुरुवारी दोन दिवस केंद्र बंद होते. यातील काही केंद्रांवर केवळ कोव्हॅक्सिन लस सुरू होती.
डाटा एंट्री ऑपरेटर बदलविले
रेडक्रॉस रक्तपेढीच्या ठिकाणी नियुक्त जिल्हा रुग्णालयाच्या दहा डाटा एंट्री ऑपरेटर यांना पुन्हा जिल्हा रुग्णालयात रुजू होण्याचे आदेश देण्यात आले आहे. या ठिकाणी अन्य डाटा एंट्री ऑपरेटर देण्यात आले आहे. दरम्यान, रेडक्रॉस रक्तपेढीचे केंद्रही लस नसल्याने शुक्रवारी बंद राहणार आहे.
आदिवासी भागातील गावांमध्ये मोहीम
शुक्रवारी दुपारपर्यंत ३१ हजार ५०० कोविशिल्ड लसीचे डोस येणार आहे. ते शनिवारी केंद्रावरही लस उपलब्ध होणार आहे. दरम्यान, यावल, रावेर, चोपडा या तालुक्यांतील आदिवासी भागांमध्ये जास्ती जास्त लसीकरण करून घ्यावे, अशा सूचना प्रशासनाकडून आरोग्य विभागाला मिळाल्या आहेत. त्यानुसार त्या भागातील उपकेंद्रांना अधिक लसीचा पुरवठा केला जाणार आहे. तीस गावांमध्ये ही विशेष मोहीम राबविली जाणार आहे.