बांगलादेशचे नवे पंतप्रधान कोण होणार? 'या' चार बड्या नेत्यांची नावे चर्चेत; कुणाला सर्वाधिक संधी?

Bangladesh Next PM: संसदेच्या ३०० जागांसाठी निवडणुका घेण्याची तयारी पूर्ण

Bangladesh Next PM: बांगलादेशमध्ये नवीन सरकार स्थापन करण्यासाठी आणि पंतप्रधान निवडण्यासाठी सार्वत्रिक निवडणुका कधीही जाहीर होऊ शकतात. निवडणूक आयोगाने राष्ट्रीय संसदेच्या ३०० जागांसाठी निवडणुका घेण्याची तयारी पूर्ण केली आहे. शेख हसीना यांना सत्तेवरून हटवल्यानंतर बांगलादेशात हंगामी सरकार कार्यरत आहेत. पण आता नव्याने निवडल्या जाणाऱ्या सरकारमध्ये चार जणांची नावे पंतप्रधानपदासाठी चर्चेत आहेत. बांगलादेशात सरकार स्थापनेसाठी १५१ ही 'मॅजिक फिगर' आहे. त्यासाठी तीन प्रमुख पक्षांमध्ये लढत होणार असून चार नावे चर्चेत आहेत.

'या' चार नावांची चर्चा

तारिक रहमान- बांगलादेशातील विरोधी पक्षाचे नेते बीएनपी हे नेते आहेत. ते पंतप्रधानपदाचे आघाडीचे उमेदवार आहेत. सध्या लंडनमध्ये राहणारे तारिक रहमान हे माजी पंतप्रधान खालिदा झिया यांचे पुत्र आहेत. बांगलादेशमध्ये आतापर्यंत केलेल्या सर्व सर्वेक्षणांमध्ये बीएनपी आघाडीवर असल्याचे दिसून आले आहे. तारिक यांच्या आईने शेवटी २००१ मध्ये बांगलादेशचे पंतप्रधान म्हणून काम पाहिले होते. त्यानंतर ते कुटुंब सत्तेबाहेर आहे.

झुबैदा रहमान- तारिक यांची पत्नी झुबैदा ही देखील पंतप्रधानपदाच्या शर्यतीत आहे. असे म्हटले जात आहे की जर बीएनपी सत्तेत आली आणि तारिक काही कारणास्तव पंतप्रधान होऊ शकले नाहीत तर झुबैदा पुढील उमेदवार असू शकतात. शेख हसीना यांच्याविरुद्ध झालेल्या बंडानंतर झुबैदा बांगलादेशी राजकारणात खूपच सक्रिय आहेत.

शफीकुर रहमान- शेख हसीना सत्तेतून बाहेर पडल्यानंतर जमात-ए-इस्लामीमध्ये झपाट्याने वाढ झाली आहे. परिणामी, जमात-ए-इस्लामीचे अमीर शफीकुर रहमान यांना पंतप्रधानपदाचे दावेदार मानले जात आहेत. जमात-ए-इस्लामीने सर्व जागा स्वबळावर लढवण्याची घोषणा केली आहे. जमातचे नेते धर्माचा मुद्दा वापरून निवडणूक रिंगणात उतरण्याची तयारी करत आहेत.

नाहिद इस्लाम- शेख हसीना यांना सत्तेबाहेर काढण्यासाठी विद्यार्थी नेता नाहिद इस्लाम यांचेही प्रयत्न होते. ते पंतप्रधानपदाचे प्रबळ दावेदार आहेत. निवडणुकीच्या घोषणेपूर्वी नाहिद यांनी तिसऱ्या आघाडीची घोषणा केली आहे. त्यांच्या पक्षाने इतर सात पक्षांसह लोकशाही आघाडीची स्थापना केली आहे.