व्हाईट हाऊस गोळीबारानंतर डोनाल्ड ट्रम्प यांचा कठोर निर्णय, व्हिसाची प्रक्रियाच थांबवली...

Donald Trump White House firing Updates: अमेरिकेच्या नॅशनल गार्ड्सवर गोळीबार झाल्यापासून ट्रम्प प्रचंड संतापल्याचे दिसत आहे.

White House firing Updates: अमेरिकेतील व्हाईट हाऊसजवळ दोन नॅशनल गार्ड्सना लक्ष्य करून गोळीबार झाला. त्यात एकाचा मृत्यू झाला आणि दुसरा गंभीर जखमी झाला. हल्लेखोर संशयित अफगाणिस्तानचा नागरिक आहे. त्याची ओळखदेखील पटवण्यात आली. विशेष म्हणजे, अमेरिकन एजन्सीने अफगाणिस्तानात त्यांच्या काही लोकांना सैन्याचे ट्रेनिंग दिले होते. त्यापैकीच एकाने हा हल्ला केल्याचे निष्पन्न झाले. त्यानंतर आता अमेरिकेने अफगाण नागरिकांवर कारवाई केली आहे. अमेरिकेचे परराष्ट्र सचिव मार्को रुबियो यांनी सांगितले की, अमेरिकेच्या परराष्ट्र विभागाने अफगाण पासपोर्टसह प्रवास करणाऱ्या सर्व व्यक्तींसाठी व्हिसा जारी करणे निलंबित केला आहे.

सोशल मीडिया प्लॅटफॉर्म X वरील एका पोस्टमध्ये रुबियो यांनी लिहिले की, राष्ट्राध्यक्ष ट्रम्प यांच्या नेतृत्वाखालील परराष्ट्र विभागाने अफगाण पासपोर्टवर प्रवास करणाऱ्या सर्व व्यक्तींना व्हिसा देणे थांबवले आहे. आपल्या लोकांचे संरक्षण करणे हे अमेरिकेचे सर्वोच्च प्राधान्य आहे.

President Trump’s State Department has paused visa issuance for ALL individuals traveling on Afghan passports. 

The United States has no higher priority than protecting our nation and our people. https://t.co/HuR1Lj7F9t

— Secretary Marco Rubio (@SecRubio) November 28, 2025

स्थलांतरितांची तपासणी होणार

यूएस सिटीझनशिप अँड इमिग्रेशन सर्व्हिसेस (USCIS) ने प्रत्येक स्थलांतरिताची पार्श्वभूमी पूर्णपणे तपासली जाईपर्यंत आणि त्याची तपासणी होईपर्यंत सर्व आश्रय देण्यासंबंधित निर्णय थांबवले आहेत, असे USCIS संचालक जोसेफ अल्डो यांनी सांगितले. २९ नोव्हेंबर रोजी X वर एका पोस्टमध्ये अल्डोने लिहिले की, प्रत्येक परदेशी व्यक्तीची तपासणी केली जाईल. सर्व गोष्टींची खात्री होईपर्यंत USCIS ने सर्व आश्रय निर्णय थांबवले आहेत. अमेरिकन जनतेची सुरक्षा नेहमीच सर्वप्रथम असेल.

गोळीबाराच्या घटनेनंतर ट्रम्प 'अँक्शन मोड'मध्ये...

२६ नोव्हेंबरला व्हाईट हाऊसजवळ रहमानउल्लाह लकनवाल नावाच्या अफगाण नागरिकाने दोन नॅशनल गार्ड्सवर गोळीबार केला. रॉयटर्सच्या वृत्तानुसार, २० वर्षीय सारा बेकस्ट्रॉम हिचा मृत्यू झाला. तर २४ वर्षीय अँड्र्यू वूल्फची प्रकृती गंभीर आहे. या घटनेला प्रतिसाद म्हणून ट्रम्प यांनी कठोर निर्णय घेतले. त्यांनी असेही म्हटले की अमेरिका सध्या देशात असलेल्या गैर-नागरिकांना दिले जाणारे संघीय फायदे आणि अनुदाने बंद करणार आहे.