हाँगकाँग: गगनचुंबी इमारतींच्या आगीने घेतले १२८ बळी, अखेर तीन दिवसांनी बचावकार्य स्थगित

Hong Kong Skyscrappers Fire: इमारतींना आग कशी लागली याचा तपास हाँगकाँग पोलिसांनी सुरू केला आहे

Hong Kong Skyscrappers Fire: हाँगकाँगमधील एकाशेजारी एक असलेल्या सात गगनचुंबी इमारतींना भीषण आग लागली होती. अखेर तिसऱ्या दिवशी अग्निशमन दलाने आणि बचाव पथकाने शोध मोहीम स्थगित केली. यातील मृतांचा आकडा १२८ वर पोहोचला आहे आणि २०० हून अधिक लोक अजूनही बेपत्ता आहेत. येथील १,९८४ अपार्टमेंटमध्ये सुमारे ४,६०० लोक राहत होते. इमारतींना आग कशी लागली याचा तपास हाँगकाँग पोलिसांनी सुरू केला आहे. तसेच, बांधकामात सहभागी असलेल्या आठ जणांनाही अटक केली आहे.

हाँगकाँग विशेष प्रशासकीय क्षेत्र (HKSAR) सरकारने पत्रकार परिषदेत सांगितले की स्थानिक वेळेनुसार सकाळी १० वाजता अग्निशमन, बचाव आणि शोध मोहिम स्थगित करण्यात आली. HKSAR सरकारचे सुरक्षा सचिव ख्रिस तांग पिंग-केउंग यांनी सांगितले की, ताई पो येथे लागलेल्या आगीत आतापर्यंत १२८ जणांचा मृत्यू झाला आहे. सरकारी शिन्हुआ वृत्तसंस्थेच्या म्हणण्यानुसार, पोलिस घटनास्थळी तपास करण्यासाठी पोहोचतील तेव्हा आणखी मृतदेह सापडण्याची शक्यता नाकारता येत नाही. २०० हून अधिक लोक बेपत्ता आहेत. बेपत्ता झालेल्यांचे कुटुंबीय त्यांच्या अपडेट्सची वाट पाहत आहेत.

३९१ अग्निशमन गाड्या, १८५ रुग्णवाहिका अन्...

दरम्यान, हाँगकाँगच्या भ्रष्टाचार विरोधी संस्थेने इमारतीच्या नूतनीकरणाच्या कामात सहभागी असलेल्या एका महिलेसह आठ जणांना अटक केली. अधिकाऱ्यांनी सांगितले की तीन दिवसांच्या या कारवाईत एकूण ३९१ अग्निशमन गाड्या, १८५ रुग्णवाहिका आणि २,३११ अग्निशमन आणि रुग्णवाहिका कर्मचारी तैनात करण्यात आले होते. अग्निशमन दलातील एकाचा मृत्यू झाला आणि १२ जण जखमी झाले. हाँगकाँग पोलिस दल संपूर्ण पुरावे गोळा करण्यासाठी तपास करत आहे. याला तीन ते चार आठवडे लागण्याची अपेक्षा आहे.

सरकारने दिली मदत

हाँगकाँग सरकारने प्रत्येक पीडित कुटुंबाला २००,००० हाँगकाँग डॉलर्स (सुमारे २५,६९३ अमेरिकन डॉलर्स)चे अनुदान जाहीर केले. पुढील आठवड्यापासून प्रत्येक कुटुंबाला ५०,००० हाँगकाँग डॉलर्सचा राहणीमान भत्ता मिळेल, असे शिन्हुआ वृत्तसंस्थेने म्हटले आहे. हाँगकाँग सरकारने गुरुवारी संध्याकाळपासून प्रत्येक बाधित कुटुंबाला त्यांच्या तात्काळ गरजा पूर्ण करण्यासाठी १०,००० हाँगकाँग डॉलर्सचे आपत्कालीन रोख अनुदान देण्यास सुरुवात केली आहे.

अलार्म वाजलाच नाही

आगीचे कारण अद्याप कळलेले नाही, परंतु खिडक्यांवर असलेल्या स्टायरोफोममुळे आगीचा प्रसार जलद गतीने झाला असावा असा संशय आहे, असे बीबीसीने वृत्त दिले आहे. आगीतून बचावलेल्यांनी तक्रार केली की अग्निशामक अलार्म काम करत नव्हते, ज्यामुळे रहिवाशांना कोणतीही आगाऊ सूचना मिळू शकली नाही. आग प्रथम वांग चेओंग हाऊसच्या खालच्या मजल्यावरील जाळ्यात लागली आणि फोम बोर्ड पेटले, त्यानंतर आग इतर इमारतींमध्ये वेगाने पसरली. वाचलेल्यांना जवळच्या १,००० रिकाम्या अपार्टमेंटमध्ये स्थलांतरित करण्यात आले आहे.