"आपली लव्हस्टोरी जरा सिनेमॅटिकच आहे..", प्रथमेश परबच्या वाढदिवसानिमित्त पत्नी क्षितिजाची खास पोस्ट

Prathamesh Parab : मराठी सिनेइंडस्ट्रीतील सर्वांचा लाडका दगडू म्हणजेच प्रथमेश परबचा आज ३१वा वाढदिवस आहे. त्यानिमित्ताने त्याची पत्नी क्षितिजा घोसाळकर हिने सोशल मीडियावर पोस्ट शेअर करत त्याला शुभेच्छा दिल्या आहेत.

मराठी सिनेइंडस्ट्रीतील सर्वांचा लाडका दगडू म्हणजेच प्रथमेश परब(Prathamesh Parab)चा आज ३१वा वाढदिवस आहे. त्यानिमित्ताने त्याची पत्नी क्षितिजा घोसाळकर (Kshitija Ghosalkar Parab) हिने सोशल मीडियावर पोस्ट शेअर करत त्याला शुभेच्छा दिल्या आहेत. लग्नानंतरच्या दुसऱ्या वाढदिवसाला क्षितिजाने त्यांच्या प्रेमकथेची खास गोष्ट चाहत्यांसमोर आणली आहे. 

क्षितिजा घोसाळकरने प्रथमेश परबसोबतचे फोटो सोशल मीडियावर शेअर करत त्याला वाढदिवसाच्या शुभेच्छा दिल्या आहेत. तिने लिहिले की, "कधी कधी वाटतं... आपल्या दोघांची लव्हस्टोरी जरा सिनेमॅटिकच आहे. लोक भेटतात, बोलतात... आणि मग प्रेम होतं. पण तू? तू माझ्या शब्दांवर प्रेम केलंस. माझ्या कॅप्शनमधील भावना वाचून... तू माझ्या मनातली मी ओळखलीस. आज तुझा वाढदिवस आहे. लग्नानंतरचा दुसरा... पण माझ्यासाठी नेहमीसारखाच स्पेशल. कारण तुझ्यासोबतच प्रत्येक वर्ष... प्रेमाचं एक नवं चाप्टर आहे."

''दररोज नव्याने तुझ्या प्रेमात पडते...''

तिने पुढे म्हटले की, "तुझा शांत स्वभाव, तुझी हलकी स्माइल, तुझं ग्राउंडेड असणं...तुझ्या स्वभावातली डेप्थ, तुझ्यातली माणुसकी, तुझं निर्मळ मन या गोष्टींमुळे मी दररोज नव्याने तुझ्या प्रेमात पडते. लग्नाने मला खूप काही शिकवलं, पण सर्वात सुंदर शिकवण हीच की योग्य व्यक्तीसोबतच आयुष्य कसं शांत, स्थिर आणि प्रेमळ वाटतं. तू जसा आज आहेस-तसाच प्रामाणिक, ग्राउंडेड, प्रेमळ आणि रिअल रहा."

"जग तुला प्रथमेश परब म्हणून ओळखतं... पण माझ्यासाठी तू ती व्यक्ती आहेस जिने माझ्या शब्दांवर प्रेम केलं, आणि त्यानंतर माझ्या आयुष्याचा सर्वात सुंदर भाग बनला. आणि म्हणूनच... बर्थडे गिफ्ट तर आधीच तुला दिले आहेत पण आता, तुझ्याच आवडीच्या गोष्टीने शुभेच्छा देते-एका कॅप्शनने. त्या कॅप्शनने ज्यातून आपली लव्हस्टोरी सुरू झाली. प्रथमेश, तुला खास दिवसाच्या शुभेच्छा. तुला वाढदिवसाच्या खूप खूप शुभेच्छा. टीप: एलेक्सा, कृपया माझ्या नवऱ्याची संपूर्ण बकेट लिस्ट लगेच पूर्ण करा", असे तिने या पोस्टमध्ये म्हटले.

वर्कफ्रंट
'टाईमपास'मधील 'दगडू' या भूमिकेमुळे प्रथमेश परब घराघरात पोहोचला. 'बालक पालक' या चित्रपटातून त्याने आपल्या अभिनय कारकिर्दीला सुरुवात केली. टाईमपासमधील 'दगडू' ही भूमिका प्रचंड गाजली. टाईमपास २, टाईमपास ३, खिचिक या मराठी चित्रपटांसोबतच त्याने 'दृश्यम' आणि 'दृश्यम २' या हिंदी चित्रपटांमध्येही महत्त्वपूर्ण भूमिका साकारल्या आहेत.