"ब्रोकेन हार्ट मदर", पतीला कंटाळलेल्या सेलिना जेटलीने मुलांसाठी मीडियाला केली ही विनंती

Celina Jaitley : अभिनेत्री सेलिना जेटली सध्या तिच्या वैवाहिक आयुष्यामुळे सोशल मीडियावर खूप चर्चेत आहे. यादरम्यान, अभिनेत्रीने मीडियाला विनंती करत इंस्टाग्रामवर एक पोस्ट शेअर केली आहे.

अभिनेत्री सेलिना जेटली सध्या तिच्या वैवाहिक आयुष्यामुळे सोशल मीडियावर खूप चर्चेत आहे. पती पीटर हाग (Peter Haag) याच्या विरोधात नुकताच घरगुती हिंसाचाराचा गुन्हा दाखल केलेली अभिनेत्री सेलिना जेटली (Celina Jaitley) सध्या कठीण परिस्थितीतून जात आहेत. १५ वर्षांनंतर दोघांच्या वैवाहिक आयुष्यावर संकट आले आहे. ती तिचा पती पीटर हागला घटस्फोट देत असल्याची चर्चा आहे. या दरम्यान, तिने सोशल मीडिया पोस्टद्वारे मीडियाला एक विनंती केली आहे.

सेलिनाने तिच्या इंस्टाग्राम अकाउंटवर पोस्ट शेअर करत स्वतःला 'ब्रोकन हार्ट मदर' म्हटलं आहे आणि लिहिले की, महत्त्वाची घोषणा. प्रिय मीडिया सदस्य, माझ्या कायदेशीर प्रकरणांशी संबंधित कोणत्याही बातमीमध्ये किंवा कव्हरेजमध्ये कृपया माझ्या मुलांचे फोटो वापरू नका, अशी मी तुम्हाला विनम्रपणे विनंती करते. मी तुमच्या संवेदनशीलतेसाठी आणि समजूतदारपणासाठी नेहमी आभारी राहीन. ब्रोकेन हार्ट मदर."

सेलिना जेटलीने नुकतेच पतीवर घरगुती हिंसाचाराचा आरोप करत गुन्हा दाखल केल्याची माहिती दिली होती. अशा परिस्थितीत, तिने त्यांच्या कायदेशीर लढाईचा परिणाम मुलांवर होऊ नये म्हणून त्यांच्या प्रायव्हसीचे संरक्षण करण्यासाठी हे पाऊल उचलले आहे. अभिनेत्रीने सांगितले होते की, ती सध्या आयुष्यातील सर्वात वाईट टप्प्यातून एकटी जात आहे. आई-वडील, भाऊ, माझं एक बाळ आणि ज्या व्यक्तीने नेहमी साथ देण्याचे वचन दिले होते, ते सर्व सोडून गेले किंवा मागे हटले. सगळे काही हिरावले गेले आणि विश्वास तुटला. तिने स्वतःला सैनिकाची मुलगी असल्याचे सांगत ती आपले युद्ध धैर्याने लढत राहतील, असे सांगितले होते.

सेलिना आणि पीटर यांचे लग्नदुबईतील एका कार्यक्रमात पीटर आणि सेलिना यांची भेट झाली होती आणि तिथूनच त्यांची मैत्री सुरू झाली. मैत्रीचं रुपांतर प्रेमात झाले. दोघांनी २०११ मध्ये लग्न केले. सेलिना आणि तिचे पती पीटर हागला चार मुले होती. जुळे मुलगे विन्स्टन आणि विन्शानचा जन्म २०१२ मध्ये झाला, तर २०१७ मध्ये आणखी दोन जुळे मुलगे वीराज आणि आर्थर झाले. दुर्दैवाने, २०२१ मध्ये हृदयविकाराने आर्थरचे निधन झाले होते, त्यानंतर सेलिना बराच काळ डिप्रेशनमध्ये होती.