हत्येनंतर ‘तिचा’ मृतदेह घेऊन भारतीय प्रियकर ४५ मिनिटं दुबईच्या रस्त्यावर कारने फिरला, अन्...

मागील ५ वर्षापासून प्रियकराचे प्रेयसीसोबत संबंध होते. अलीकडेच या प्रेयसीचे दुसऱ्याशी संबंध आहे समजताच या दोघांमध्ये भांडण झाले होते.

दुबई – यूएईच्या दुबई कोर्टाने रविवारी निवासी भारतीयावर प्रेयसीची हत्या केल्याचा आरोप निश्चित केला आहे. मूळ भारतीय असणाऱ्या या प्रियकराने प्रेयसीची हत्या करुन तिचा मृतदेह गाडीत बसवून शहरात फिरत असल्याची खळबळजनक घटना घडली. जवळपास ४५ मिनिटं हा प्रियकर मृत प्रेयसीचा मृतदेह गाडीत बसवून शहरात चक्कर मारत होता. त्यानंतर त्याने पोलिसांकडे जावून स्वत:ला अटक करुन घेतली.

रविवारी या प्रकरणी कोर्टात सुनावणी होती. यावेळी आरोपी प्रियकराने त्याचा गुन्हा कबूल केला. मृतक प्रेयसीचे अन्य पुरुषासोबत संबंध असल्याने प्रियकराचा राग अनावर झाला त्यातून त्याने प्रेयसीची हत्या केली. प्रियकराने प्रेयसीचा गळा दाबला त्यात तिचा मृत्यू झाला. घटनेनंतर आरोपीने मुरकाब्बात पोलीस ठाण्यात हजर होऊन गुन्हा कबूल केला. स्थानिक माध्यमानुसार आरोपीने त्याची गाडी पोलीस ठाण्यात आणली आणि पोलिसांसमोर आत्मसमर्पण केले.

मागील ५ वर्षापासून प्रियकराचे प्रेयसीसोबत संबंध होते. अलीकडेच या प्रेयसीचे दुसऱ्याशी संबंध आहे समजताच या दोघांमध्ये भांडण झाले होते. प्रेयसी आपला विश्वासघात करत असल्याची भावना प्रियकराच्या मनात निर्माण झाली होती. आरोपीने पोलिसांना सांगितले की, या घटनेबाबत प्रेयसीच्या घरच्यांनाही ईमेलवरुन सांगितले होते. जर तुम्ही तुमच्या मुलीला समजावलं नाही तर मी तिची हत्या करेन असं प्रियकराने ईमेलमध्ये लिहिलं होतं.  

पोलिसांच्या माहितीनुसार, एका मॉलच्या बाहेर हे दोघं पार्किंगमध्ये गाडीत बसले होते. यावेळी अनैतिक संबंधावरुन दोघांमध्ये टोकाचं भांडण झालं. प्रियकराचा राग अनावर झाल्याने त्याने प्रेयसीची हत्या केली. त्यानंतर तिचा मृतदेह कारमध्येच ठेऊन एका रेस्टॉरंटमध्ये जावून त्याने जेवण आणि पाण्याची बॉटल ऑर्डर केली. जवळपास ४५ मिनिटे कार शहरात फिरवल्यानंतर त्याने स्वत:ला पोलिसांच्या स्वाधीन केले. पोलिसांनी या आरोपीविरोधात हत्येचा गुन्हा नोंद केला. आरोपीला जन्मठेपेची शिक्षा द्यावी अशी मागणी प्रेयसीच्या वकिलांकडून करण्यात आली आहे.