धक्कादायक; बॉयफ्रेंडच्या प्रेमासाठी दहावीतल्या मुलीनं वडिलांचाच जीव घेतला!

प्रियकराच्या मदतीने वडिलांचा खून करून मृतदेह जाळून बंगल्यात ठेवला. 

ठळक मुद्देमल्लेश्वरम कॉलेजात बी कॉमच्या पहिल्या वर्षात शिकणार्‍या १९ वर्षीय तरुणासोबत प्रेमसंबंध होते. सहा झोपेच्या गोळ्या दुधामध्ये टाकून वडिलांना दूध रात्री पिण्यासाठी दिले. वडिलांना गाढ झोप लागल्यानंतर मुलीने आपल्या प्रियकराला बोलावले.

बंगळुरू - बंगरूळूमध्ये ४१ वर्षीय व्यावसायिकाचा दहावीत शिकणाऱ्या १५ वर्षीय मुलीच्या प्रेमसंबंधास विरोध होता. तिचे मल्लेश्वरम कॉलेजात बी कॉमच्या पहिल्या वर्षात शिकणार्‍या १९ वर्षीय तरुणासोबत प्रेमसंबंध होते. तसेच ही मुलगी फोन आणि सोशल मीडियावर सतत सक्रिय होती. ही बाब तिच्या वडिलांना आवडत नव्हती आणि वडिलांचा या प्रेमसंबंधास विरोध होता. म्हणून ते तिला सतत ओरडत. याच गोष्टीचा तरुणीला कंटाळा आला होता. म्हणून वडिलांचा काटा काढण्यासाठी तिने प्रियकराच्या मदतीने वडिलांचा खून करून मृतदेह जाळून बंगल्यात ठेवला. 

शनिवारी मुलीचा भाऊ आणि आई पुद्दुचेरीला एका कौटुंबिक कार्यक्रमासाठी गेले होते. तेव्हा मुलीने प्रियकराच्या मदतीने वडिलांचा काटा काढायचं ठरविलं. वडिलांना रात्री झोपण्यापूर्वी दूध पिण्याची सवय होती. म्हणून मुलीने आपल्या शाळेच्या बागेत झोपेच्या गोळ्या ठेवल्या आणि सहा झोपेच्या गोळ्या दुधामध्ये टाकून वडिलांना दूध रात्री पिण्यासाठी दिले. वडिलांना गाढ झोप लागल्यानंतर मुलीने आपल्या प्रियकराला बोलावले. दोघांनी चाकूने वडिलांना भोसकले. नंतर तरुणी आणि तरुण मृतदेहाची विल्हेवाट कशी लावायची याचा आठ तास युक्त्या लढवत होते. शेवटी मृतदेहाची विल्हेवाट लावण्यासाठी बाथरूममध्ये दोघांनी मृतदेहावर पेट्रोल टाकले आणि आग लावली. वडिलांनी जाळून घेतल्याचा बनाव रचत अग्निशमन दलाला देखील मुलीने कॉल केला. आग लावताना तरुणाने स्वतःलाही इजा करून घेतली. जेणेकरून पुढे त्यांना वाचवताना या जखमा झाल्या असा बनाव करता येईल. मृतदेह जाळल्यानंतर आजूबाजूला राहणाऱ्या शेजाऱ्यांना धूर आल्याने ते बाहेर आले. दरम्यान, मुलीने गच्चीवर जाऊन आरडा ओरड केला आणि प्रियकराने पळ काढला होता. पोलिसांनी घटनास्थळी पोहचताच त्यांना जळालेला मृतदेह राजाजीनगर बंगल्यात आढळून आला. नंतर चौकशीअंती पोलिसांनी दोघांना अटक केली. त्यावेळी मुलीने मला माझं स्वातंत्र्य परत मिळविण्यासाठी वडिलांची हत्या केल्याचे काबुल केले.