१३ वर्षीय मुलीवर बलात्कार करणाऱ्या नातेवाईकाच्या पोलिसांनी आवळल्या मुसक्या

Crime News : मुलीला बरे वाटत नसल्याने तिला घेऊन तिची आई रुग्णालयात गेली असता ती पाच महिन्यांची गर्भवती असल्याचे उघड झाले.

वास्को - एका १३ वर्षीय मुलीवर अनेकवेळा बलात्कार केल्याप्रकरणी वास्को पोलिसांनी एका ३५ वर्षीय व्यक्तीला अटक केली आहे. बलात्कार करणारा तो व्यक्ती त्या १३ वर्षीय मुलीच्या आत्याचा पती असल्याची माहिती चौकशीवेळी उघड झाली.

दक्षिण गोव्यातील वास्को पोलीसांनी दिलेल्या माहीतीनुसार, शुक्रवारी (दि.२७) रात्री ११ च्या सुमारास त्या १३ वर्षीय मुलीच्या आईने तिच्या मुलीवर होणाऱ्या अन्यायाबाबत तक्रार नोंदवली. मुलीला बरे वाटत नसल्याने तिला घेऊन तिची आई रुग्णालयात गेली असता ती पाच महिन्यांची गर्भवती असल्याचे उघड झाले. आपली १३ वर्षीय मुलगी गर्भवती असल्याचे आईला समजताच तिने त्वरित वास्को पोलीस स्थानकावर त्याबाबत तक्रार नोंदविली. पोलिसांनी ह्या प्रकरणात त्वरित चौकशीला सुरुवात केली असता त्या मुलीच्या आत्याच्या पतीनेच तिच्यावर अनेकवेळा बलात्कार केल्याचे उघड झाले. 

मुलीवर अन्याय कोणी केला याची माहिती पोलिसांना मिळताच त्यांनी त्वरित कारवाई करून कुकर्म करणाऱ्या त्या आरोपीच्या मुसक्या आवळल्या. १३ वर्षीय मुलीचा लैंगिक छळ करणाऱ्या त्या आरोपीविरुद्ध पोलिसांनी भादस ३७६(३) कलमाखाली तसेच गोवा बाल कायद्याच्या ८(२) आणि पोक्सो कायद्याच्या कलम ४, ८ आणि १२ कलमाखाली गुन्हा नोंद करून त्याला अटक केली. शनिवारी (दि. २८) त्या आरोपीला न्यायालयात उपस्थित केला असता त्यास पाच दिवसांच्या पोलीस कोठडीत घेण्याचा आदेश बजावण्यात आला. वास्को पोलीस स्थानकाचे निरीक्षक कपिल नायक यांच्या मार्गदर्शनाखाली अधिक तपास चालू आहे.