खळबळजनक! वाढदिवशीच 3 वर्षांच्या चिमुकल्याची निर्घृण हत्या; पोत्यात सापडला मृतदेह अन्...

Crime News : वाढदिवसाच्या दिवशीच एका तीन वर्षांच्या मुलाची निर्घृणपणे हत्या करण्यात आली आहे.

नवी दिल्ली - देशात अनेक धक्कादायक घटना घडत आहेत. याच दरम्यान मध्य प्रदेशमध्ये माणुसकीला काळीमा फासणारी एक घटना घडली आहे. वाढदिवसाच्या दिवशीच एका तीन वर्षांच्या मुलाची निर्घृणपणे हत्या करण्यात आली आहे. मध्य प्रदेशातील (Madhya pradesh) खंडवा (Khandwa district) जिल्ह्यात एक हृदयद्रावक घटना उघडकीस आली आहे. चिमुकला दुपारच्या वेळेस आपल्या घराजवळ खेळत असताना अचानक बेपत्ता झाला. कुटुंबातील लोकं त्याचा शोध घेत होते, मात्र तो सापडत नव्हता. त्यानंतर संध्याकाळी उशीरा त्याचा मृतदेह एका निर्जन ठिकाणी पोत्यात बांधलेल्या अवस्थेत आढळून आला. त्यानंतर संपूर्ण परिसरात एकच खळबळ उडाली आहे. 

चिमुकल्याचा मृतदेह पाहून कुटुंबीयांनी आणि ग्रामस्थांनी मुलाची हत्या झाल्याचा संशय व्यक्त केला आहे. मुलाच्या शरीरावर जखमेच्या खुणा आहेत, ज्यावरून त्याची निर्घ़ृणपणे हत्या करण्यात आल्याचं समोर येत आहे. पोलिसांना याबाबत माहिती देण्यात आली आहे. सध्या मृतदेह पोस्टमार्टमसाठी रुग्णालयात पाठवण्यात आला आहे. या प्रकरणी पोलिसांनी गुन्हा दाखल केला असून अधिक तपास सुरू केला आहे. मिळालेल्या माहितीनुसार, खंडवा जिल्ह्यातील श्याम कोठारे यांचा तीन वर्षांचा मुलगा अक्षांश कोठारे याचा वाढदिवस होता. तो घराभोवती खेळत होता. त्यानंतर तो तेथून अचानक गायब झाला. 

पोत्यात बांधलेल्या अवस्थेत सापडला मृतदेह

मुलाचे वडील आणि कुटुंबीयांनी पोलीस ठाण्यात अक्षांश हा बेपत्ता झाल्याची तक्रार दाखल केली होती. त्यानंतर कुटुंबातील सदस्य आणि परिसरातील लोक त्याचा शोध घेत होते. पण रात्री 10 वाजता परिसरातील काही लोक एका निर्जन घरात पोहोचले. जिथे अक्षांशचा मृतदेह एका पोत्यात बांधलेल्या अवस्थेत सापडला, ते पाहून सगळ्यांनाच मोठा धक्का बसला. घटनेचं गांभीर्य लक्षात घेऊन पोलिसांनी देखील वेगाने तपास सुरू केला आहे. परिसरात भीतीचे वातावरण निर्माण झाले असून पोलीस अधिक तपास करत आहेत. एका हिंदी वेबसाईटने याबाबतचे वृत्त दिले आहे.