बदलापुरात व्यसनी मित्राने केला मित्राच्या आईवर बलात्काराचा आणि जीवे मारण्याचा प्रयत्न

घटनेनंतर पोलिसांनी काही तासांतच आरोपीला अटक केली असून न्यायालयानं त्याला पोलीस कोठडी सुनावली आहे

बदलापूर - आपली मुलं चांगल्या संगतीत राहावी, याकडे प्रत्येकच पालकांचं लक्ष असतं. मात्र हीच गोष्ट बदलापुरात एका महिलेच्या जीवावर बेतली आहे. कारण मुलाच्या दारुड्या मित्राला आपल्या मुलासोबत न राहण्याची समज दिल्यानंतर त्याने चक्क मित्राच्या आईवर बलात्कार करण्याचा आणि जीवे मारण्याचा प्रयत्न केला आहे.

बदलापूर पश्चिमेच्या बॅरेज रोडवरील रमेशवाडी भागात हा प्रकार घडला. या भागातील एका गृहसंकुलात पीडित महिला या त्यांच्या कुटुंबियांसोबत राहतात. त्यांचे पती आणि मुलगा असे दोघेही सरकारी नोकरी करतात. मात्र त्यांच्याच संकुलात राहणाऱ्या दिनेश गोल्हे नामक मुलाशी पीडित महिलेच्या मुलाची मैत्री होती. मात्र दिनेशला दारू पिण्याचं व्यसन असल्यानं या मैत्रीमुळे आपल्याही मुलाला नको त्या सवयी लागतील आणि तो वाया जाईल, अशी भीती सदर महिलेला होती. त्यामुळे त्यांनी दिनेशला आपल्या मुलासोबत राहू नको, अशी ताकीद दिली होती. मात्र याचा राग आल्यानं दिनेश याने बदला घ्यायचं ठरवलं आणि १२ डिसेंबर रोजी त्या घरी एकट्याच असताना त्यांच्या घरात घुसला. त्यानंतर त्याने त्या महिलेला यांना जाब विचारत त्यांच्यावर बलात्कार करण्याचा प्रयत्न केला, मात्र महिलेने त्याला विरोध केल्यानं त्याने थेट चाकूने त्यांच्या गळ्यावर वार करण्याचा प्रयत्न केला. हा वार चुकवण्यासाठी महिलेने यांनी हात मध्ये टाकला असता दिनेश याने त्यांच्या हातावर वार केले. यावेळी सदर महिलेने आरडाओरडा केल्यानं जिन्यात कचरा गोळा करत असलेल्या सफाई कामगार महिलेने सोसायटीच्या लोकांना गोळा केलं आणि दिनेश तिथून पळून गेला.

या घटनेनंतर पोलिसांनी काही तासातच दिनेशला अटक केली असून न्यायालयानं त्याला पोलीस कोठडी सुनावली आहे. तर पीडित महिलेवर उपचार करून त्यांना घरी सोडण्यात आलं असलं, तरी त्या मानसिक धक्क्यातून अद्याप सावरलेल्या नाहीत