पुण्यात पुन्हा थरार... मित्राचा खून करुन आरोपी चाकूसह पोलीस ठाण्यात हजर

पुण्यातील आर सी एम गुजराथी शाळेसमोरील घटना 

ठळक मुद्देयाबाबत पोलिसांनी दिलेल्या माहितीनुसार, आरोपी चेतन पाटील व त्याचा मित्र अमन यादव हे कचरा वेचण्याचे काम करतात. दोन -तीन दिवसांपूर्वी त्यांच्यात किरकोळ कारणावरुन भांडणे झाली होती

पुणे : कचरा वेचकांमध्ये चेष्टा मस्करीत झालेल्या भांडणाच्या वादातून तरुणाने चाकूने आपल्या मित्रावर वार करुन त्याचा खून केला. त्यानंतर त्याने स्वत:च पोलीस ठाण्यात जाऊन या प्रकाराची माहिती दिली. अमन अशोक यादव (वय २६) असे मृत्यु पावलेल्या तरुणाचे नाव आहे. आर सी एम गुजराथी शाळेसमोरील फुटपाथवर आज सकाळी हा प्रकार घडला. चेतन पाटील असे आरोपीचे नाव असून फरासखाना पोलिसांनी त्याला ताब्यात घेतले आहे. 

याबाबत पोलिसांनी दिलेल्या माहितीनुसार, आरोपी चेतन पाटील व त्याचा मित्र अमन यादव हे कचरा वेचण्याचे काम करतात. दोन -तीन दिवसांपूर्वी त्यांच्यात किरकोळ कारणावरुन भांडणे झाली होती. त्याचा राग पाटील याच्या मनात होता. आज सकाळी ते कचरा गोळा करण्यासाठी पुन्हा आर सी एम गुजराथी शाळेसमोर आले होते. येथील फुटपाथवर त्यांच्यावर पुन्हा वाद झाला. त्यावेळी पाटील याने अमन यादव याच्यावर चाकूने वार करुन त्याचा खून केला. त्यानंतर तो स्वत:च रक्ताळलेला चाकू घेऊन पोलीस चौकीत पोहचला. चाकूसह आलेल्या आरोपीला पाहून पोलिसांची धांदल उडाली. त्याने दिलेल्या माहितीनुसार पोलिसांनी तातडीने घटनास्थळी धाव घेतली. तेथे एक मृतदेह पडलेला आढळून आला. पोलिसांनी आरोपीला ताब्यात घेतले असून मृतदेह ससून रुग्णालयात पाठविण्यात आला आहे.