ठळक मुद्देपाकिस्तानचा कर्णधार बाबर आझमवर गंभीर आरोपमहिलेचा शारीरिक व मानसिक छळ, PCB कडून न्याय मिळत नसल्याचा दावामहिलेचे कोट्यवधी रुपयेही बुडवले
५३ जणांचा चमू घेऊन किवी देशात दाखल झालेल्या पाकिस्तानी खेळाडूंपैकी ७ जणांचा कोरोना रिपोर्ट पॉझिटिव्ह आला. त्यात १४ दिवसांच्या आयसोलेशनमध्येही पाकिस्तानी खेळाडू नियम मोडत असल्याचे CCTV फुटेजमधून समोर आले आणि त्यामुळे न्यूझीलंड सरकारनं त्यांना फायनल वॉर्निंग दिली आहे. आता एकही चूक त्यांना थेट न्यूझीलंडमधून हद्दपार करू शकते. अशात पाकिस्तानचा कर्णधार बाबर आझम ( Babar Azam) हा संकटात येण्याची चिन्हे दिसू लागली आहेत.
बाबर आझम हा मर्यादित षटकांच्या क्रिकेटमध्ये दर्जेदार फलंदाज आहे आणि त्यामुळेच त्याची तुलना सतत टीम इंडियाचा कर्णधार विराट कोहलीशी होते. पण, मैदानाबाहेरील बाबर आझमचे 'लफडं' समोर आलं आहे. त्याच्यावर एका महिलेनं लैंगिक अत्याचार व आर्थिक फसवणुकीचे आरोप केले आहेत. लाहोरमधील या महिलेचे नाव हमिझा मुख्तार असे आहे आणि शनिवारी तिनं पत्रकारपरिषद घेऊन पाकिस्तानच्या फलंदाजावर गंभीर आरोप केले. क्रिकेटमध्ये नाव कमवण्यापूर्वी बाबरने आपल्याशी शारीरिक संबंध ठेवले होते आणि मानसिक त्रासही दिला होता, असा आरोप हमिझानं केला. बाबर हा आपला शाळेतील मित्र असून एकाच परिसरात राहत असल्याचा दावाही तिनं केला.
हमिझा पुढे म्हणाली,''२०१०मध्ये बाबरनं मला प्रपोज केलं आणि २०११मध्ये कोर्ट मॅरेज करण्यासाठी हे दोघं घरातून पळूनही गेले होते. दोघांच्या घरचे या लग्नाला तयार होणार नसल्यानं, हे पाऊल उचलले होते. पण, बाबरनं लग्न करण्यास नकार दिला. लग्नाचं खोटं आश्वासन देऊन त्यानं दहा वर्ष माझ्याशी संबंध ठेवले.''
हमिझा ब्यूटी सलोन चालवायची आणि बाबरला आर्थिक मदतही केल्याचं तिनं सांगितले. या दहा वर्षांत बाबरनं माझ्याकडून कोट्यवधी रुपये घेतले आणि त्यापैकी एकही कवडी परत केली नाही. बाबरला क्रिकेटर बनवण्यासाठी आर्थिक मदत करून मी मोठा वाटा उचलला, असेही हमिझानं सांगितले. हमिझानं याबाबत तक्रारही दाखल केली आहे. पोलीस व पाकिस्तान क्रिकेट बोर्ड तक्रारीला भीक घालत नसल्याचा दावाही तिनं केला.
पाहा व्हिडीओ...
बाबर आझमनं २९ कसोटीत २०४५, ७७ वन डेत ३५८० आणि ४४ ट्वेंटी-२०त १६८१ धावा केल्या आहेत. त्याच्या नावावर १७ आंतरराष्ट्रीय शतकं आहेत.
Web Title: Pakistani Woman Sensationally Accuses Babar Azam Of Sexually And Financially Abusing Her, video
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
