ऑस्ट्रेलियानं पहिल्या कसोटीत पाकिस्तानविरुद्ध दणदणीत विजय मिळवला. ऑस्ट्रेलियानं एका डावात कुटलेल्या 580 धावा पाकिस्तानला दोन्ही डावांत मिळूनही करता आल्या नाही. बाबर आझमचे शतक आणि मोहम्मद रिझवानच्या 95 धावांच्या खेळीनंतरही पाकिस्तानला एक डाव व 5 धावांनी हार मानावी लागली. दोन कसोटी सामन्यांच्या मालिकेत ऑस्ट्रेलियानं 1-0 अशी आघाडी घेतली आहे. पण, या सामन्यादरम्यान एक असा किस्सा घडला की ज्याची चर्चा संपूर्ण ऑस्ट्रेलियात सुरू आहे. त्यामागे भारतीय टॅक्सी चालक कारणीभूत आहे. ऑस्ट्रेलियात टॅक्सी चालवणाऱ्या भारतीय व्यक्तीनं पाकिस्तानच्या खेळाडूंकडून पैसे घेण्यास नकार दिला आणि ही गोष्ट वाऱ्यासारखी पसरली. त्याच्या नकार देण्यामागचं कारणही तसंच आहे आणि ते ऐकून भारतीयांना त्याचे कौतुक वाटेल.
पाकिस्ताननं प्रथम फलंदाजी करताना पहिल्या डावात 240 धावा केल्या. असाद शफिकनं सर्वाधिक 76 धावा करताना पाकिस्ताचा डाव सावरला. ऑस्ट्रेलियाच्या मिचेल स्टार्क ( 4/52), पॅट कमिन्स ( 3/60) आणि जोश हेझलवूड ( 2/46) यांनी पाकिस्तानला धक्के दिले. त्यानंतर फलंदाजीला आलेल्या ऑस्ट्रेलियानं पाक गोलंदाजांचा चांगलाच समाचार घेतला. डेव्हिड वॉर्नरनं 296 चेंडूंत 10 चौकारांच्या मदतीनं 154 धावा कुटल्या. जोस बर्नचे शतक तीन धावांनी हुकलं. त्यानं 166 चेंडूंत 10 चौकारांसह 97 धावा केल्या. पण, या सामन्यात भाव खाल्ला तो मार्नस लॅबुश्चॅग्नेनं... त्यानं कसोटीतील पहिले शतक झळकावताना 185 धावांची खेळी केली. 279 चेंडूंत त्यानं 20 चौकार मारले. मॅथ्यू वेडनं 60 धावांची खेळी करताना ऑस्ट्रेलियाला 580 धावांपर्यंत मजल मारून दिली.
पाकिस्तानच्या यासिर शाहनं सर्वाधिक 4 विकेट्स घेतल्या. शहीन शाह अफ्रिदी आणि हॅरीस सोहैल यांनी प्रत्येकी दोन विकेट्स घेतल्या. दुसऱ्या डावातही पाकिस्तानची कामगिरी निराशाजनक राहिली. सलामीवीर शान मसूदनं 42 धावा करताना संघाच्या आशा कायम राखल्या. पण, मधल्या फळीचे तीन फलंदाज एकेरी धावा करून माघारी परतले. बाबर आझम आणि रिझवान यांनी पाकच्या आशा पल्लवीत केल्या. दोघांनी सहाव्या विकेटसाठी 132 धावांची भागीदारी केली. आझम 173 चेंडूंत 13 चौकारांच्या मदतीनं 104 धावांत माघारी परतला. रिझवान आणि यासिर यांनी सातव्या विकेटसाठी अर्धशतकी धावा जोडल्या. यासिरचं शतक मात्र 3 धावांनी हुकलं. रिझवान माघारी परतल्यानंतर पाकचा दुसरा डाव 335 धावांवर गुंडाळण्यात ऑस्ट्रेलियाला यश मिळालं. हेझलवूड ( 4/63), मिचेल स्टार्क ( 3/73) आणि पॅट कमिन्स ( 2/69) यांनी पाकचा धाव गुंडाळला.
या सामन्याचे समालोचन करताना भारतीय टॅक्सी चालकाचा उल्लेख झाला. त्यात अॅलिसन मिचेलनं ऑस्ट्रेलियाचा दिग्गज गोलंदाज मिचेल जॉन्सनला हा किस्सा सांगितला. अॅलिसन म्हणाली,''मला सामन्याच्या ठिकाणी एका भारतीय टॅक्सी चालकानं सोडलं. मी क्रिकेटचे समालोचन करते असे त्याला समजताच त्यानं माझ्याकडून पैसे घेतले नाही. कारण तो क्रिकेटचा जबरदस्त फॅन आहे. याच चालकानं पाकिस्तानच्या शाहीन आफ्रिदी, यासीर शाह आणि नसीम शाह यांना एका हॉटेलमध्ये सोडलं आणि केवळ क्रिकेटवर प्रेम असल्यामुळे त्यानं पाक खेळाडूंकडून पैसे घेण्यास नकार दिला.''
ऐका किस्सा....
Web Title: An Indian taxi driver in Australia refused to take money from Pakistani players for a ride
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
