KL Rahul on Team India Batting, IND vs SA 1st ODI: टीम इंडियाला दक्षिण आफ्रिकेकडून लाजिरवाण्या पराभवाला सामोरे जावे लागले. प्रथम कोलकाता आणि नंतर गुवाहाटी कसोटी सामन्यांमध्ये आफ्रिकेने विजय मिळवला. कोलकातामध्ये संघाला १२४ धावांचे लक्ष्य गाठता आले नाही. अवघ्या अडीच दिवसांत भारतीय संघाचा पराभव झाला. तर गुवाहाटीमध्ये संघाला कसोटी क्रिकेट इतिहासातील सर्वात मोठा पराभव पत्करावा लागला. दक्षिण आफ्रिकेने ४०८ धावांनी सामना जिंकला आणि मालिका २-०ने जिंकले. दोन्ही सामन्यांमध्ये टीम इंडियाच्या फलंदाजांना फिरकी गोलंदाजी हाताळण्यात अपयश आले. याच मुद्द्यावर आज केएल राहुलला प्रश्न विचारण्यात आला.
मलाही उत्तर माहिती नाही
"गेल्या दोन हंगामात आमचे फलंदाज स्पिन गोलंदाजी चांगल्या पद्धतीने खेळू शकले नाहीत. आधी आमचे खेळाडू चांगले कसे खेळायचे आणि आता चांगले का खेळू शकत नाही याचे उत्तर मलाही माहिती नाही. माझ्याकडे या प्रश्नाचे ठोस उत्तर नाही. संघ आणि फलंदाजांचा गट म्हणून या परिस्थितीत सुधारणा कशी करायची त्याकडे लक्ष देणे इतकंच आमच्या हातात आहे," असे राहुलने अतिशय प्रामाणिकपणे सांगितले.
एका रात्रीत बदल घडणार नाही
"आमचे फलंदाज स्पिन गोलंदाजी खेळताना चुकत आहेत. त्यात सुधारणा करण्याचे प्रयत्न सुरू आहेत. पण एका रात्रीत बदल घडणार नाही हे सगळ्यांची समजून घ्यायला हवे. भविष्यात भारतीय संघ श्रीलंका आणि ऑस्ट्रेलियाशी क्रिकेट मालिका खेळणार आहे. या मालिकेपर्यंत आमचे फलंदाज स्पिन गोलंदाजी उत्तमपणे खेळू शकतील अशी मला आसा आहे. जे वरिष्ठ खेळाडू स्पिन गोलंदाजी उत्तम खेळायचे त्यांचेही मार्गदर्शन घेण्याची आमची पूर्ण तयारी आहे," असेही राहुलने स्पष्ट केले.
ऋतुराज प्लेईंग ११ मध्ये असेल?
"ऋतुराज गायकवाड अतिशय उत्तम खेळाडू आहे. त्याने वेळोवेळी आपल्या फलंदाजीने स्वत:ला सिद्ध करून दाखवले आहे. त्याला मर्यादित षटकांच्या सामन्यात अतिशय मर्यादित संधी मिळाल्या. पण त्या संधी त्याने वाया जाऊ दिल्या नाहीत. संघासाठी त्याने उत्तम कामगिरी केली. त्यामुळे या मालिकेत ऋतुराज गायकवाडला संधी देण्याचा आमचा मानस आहे," असे केएल राहुलने अतिशय स्पष्टपणे सांगितले.
