पैठणजवळील पेपर कंपनीत शॉर्टसर्किट; ६ कोटींचे नुकसान, प्रसंगावधानामुळे १९ कामगार वाचले!

या आगीत कंपनीचे अंदाजे साडेपाच ते सहा कोटी रुपयांचे नुकसान झाल्याची माहिती

जायकवाडी ( छत्रपती संभाजीनगर) : पैठण-छत्रपती संभाजीनगर महामार्गावरील पेपर उत्पादन करणाऱ्या नाथ इंडस्ट्रीज लिमिटेड कंपनीला शॉर्टसर्किटमुळे शनिवारी मध्यरात्री लागलेल्या भीषण आगीत कंपनीचे सहा कोटी रुपयांचे मोठे नुकसान झाले. परंतु, आग लागताच कंपनी व्यवस्थापनाने दाखवलेल्या प्रसंगावधानामुळे आगीच्या भक्ष्यस्थानी पडण्यापूर्वीच कंपनीतील १९ कामगारांना सुखरूप बाहेर काढण्यात यश आल्याने मोठी जीवितहानी टळली आहे.

हा अपघात २९ नोव्हेंबरच्या मध्यरात्री ३:३० वाजता कंपनीच्या पेपर कोटिंग विभागातील रूममध्ये शॉर्टसर्किटमुळे घडला. या रूममध्ये असलेला पक्का माल, कच्चा माल, केमिकल रसायने आणि महागडी मशिनरी यासह आदी वस्तू आगीत जळून खाक झाल्या.

प्रसंगावधान राखल्याने कामगार वाचले
आग लागल्याचे लक्षात येताच कंपनी व्यवस्थापनाने तातडीने १९ कामगारांना सुरक्षित बाहेर काढले. यामुळे या दुर्घटनेत सुदैवाने कोणत्याही प्रकारची जीवितहानी झाली नाही. कामगारांचे प्राण वाचल्याने कंपनीसह प्रशासनाने सुटकेचा निःश्वास टाकला. या आगीत कंपनीचे अंदाजे साडेपाच ते सहा कोटी रुपयांचे नुकसान झाल्याची माहिती कंपनीचे व्यवस्थापक गजानन अंशीकर यांनी दिली आहे. 

तीन तासांच्या प्रयत्नानंतर आग आटोक्यात
कंपनीतील कर्मचाऱ्यांनी तातडीने अग्निशमन दल आणि एमआयडीसी पैठण पोलिसांना घटनेची माहिती दिली. सपोनि ईश्वर जगदाळे यांच्यासह पोलीस पथक तातडीने घटनास्थळी पोहोचले. आग आटोक्यात आणण्यासाठी छत्रपती संभाजीनगर येथून तीन, पैठण नगरपालिका एक आणि एमआयडीसी पैठणची एक, अशा एकूण पाच अग्निशमन दलाच्या गाड्या दाखल झाल्या. अग्निशमन दलाच्या जवानांनी सलग तीन तास शर्थीचे प्रयत्न करून सकाळी ६:३० वाजेपर्यंत आग पूर्णपणे आटोक्यात आणली. याप्रकरणी एमआयडीसी पैठण पोलिस ठाण्यात जळीत नोंद करण्यात आली असून, पोलीस पुढील तपास करत आहेत.