अ‍ॅप-आधारित बाईक-टॅक्सी सेवा रॅपिडोशी (Rapido) संबंधित एका ड्रायव्हरच्या बँक खात्यात ३३१ कोटी रुपये जमा असल्याचं प्रकरण समोर आलंय. ही रक्कम केवळ आठ महिन्यांत ड्रायव्हरच्या खात्यात जमा झाली आहे. उदयपूर येथे झालेल्या एका शाही विवाहाच्या खर्चासाठी या खात्यातून एक कोटी रुपयांचे पेमेंट झाल्यानंतर हे प्रकरण सक्तवसुली संचालनालयाच्या (ED) निदर्शनास आलं.
ईडीच्या अधिकाऱ्यांनी तपास केल्यावर असे आढळले की या ‘कोट्यधीश’ खात्याची माहिती खुद्द रॅपिडो ड्रायव्हरलाही नाही आणि तो अत्यंत मुश्किलने आपला घरखर्च चालवत आहे. ईडी अधिकाऱ्यांचा असा विश्वास आहे की हे एक ‘म्यूल खातं’ (Mule Account) आहे, ज्याचा वापर काळ्या पैशाची हेराफेरी करण्यासाठी केला जात आहे.
अधिकाऱ्यांचं म्हणणं आहे की, या खात्यात जमा झालेले कोट्यवधी रुपये अवैध ऑनलाइन बेटिंग नेटवर्क 1xBet शी संबंधित व्यवहारांचा भाग असू शकतात. पीटीआयच्या एका रिपोर्टमध्ये सूत्रांच्या हवाल्यानं सांगण्यात आलं आहे की, ईडीनं 1xBet शी संबंधित व्यवहारांच्या मनी ट्रेलचा शोध घेत असताना हे प्रकरण पकडलं. तपासणीदरम्यान ड्रायव्हरच्या खात्यात संशयास्पद पैशांची सतत एंट्री होत असल्याचे दिसून आलं.
दोन खोल्यांच्या घरात राहतो ड्रायव्हर
यावर कारवाई करत ईडीनं बँक रेकॉर्डमध्ये नोंदवलेल्या पत्त्यावर छापा टाकला, जिथे टीमला आढळलं की ड्रायव्हर दिल्लीच्या एका सामान्य कॉलनीत दोन खोल्यांच्या घरात राहत होता. त्याचं उत्पन्न आणि जीवनशैलीवरून हे स्पष्ट होतं की त्याला या मोठ्या व्यवहारांची माहिती असण्याची शक्यता फारच कमी आहे.
उदयपूरच्या शाही विवाहाचा खर्च यातूनच
या तपासणीला आणखी खोली मिळाली जेव्हा ईडीला आढळलं की ड्रायव्हरच्या खात्यात जमा झालेल्या रकमेपैकी एक कोटी रुपयांहून अधिक रक्कम उदयपूरमधील एका पंचतारांकित हॉटेलमध्ये आयोजित केलेल्या एका भव्य डेस्टिनेशन वेडिंगच्या पेमेंटसाठी वापरण्यात आली होती. हा विवाह कथितरित्या गुजरातमधील एका युवा राजकारण्याशी जोडला जात आहे, जो लवकरच चौकशीच्या कक्षेत येऊ शकतो.
ईडीला शंका आहे की हा विवाह गैरप्रकारे मिळवलेल्या पैशातून आयोजित करण्यात आला होता आणि ड्रायव्हरचं खातं केवळ एक माध्यम म्हणून वापरलं गेलं. चौकशीत ड्रायव्हरनं स्पष्ट केले की त्याला या व्यवहारांची माहिती नव्हती आणि त्याचा विवाह किंवा त्यात सामील असलेल्या कुटुंबांशी कोणत्याही प्रकारचा संबंध नाही.
हे खातं म्यूल अकाउंट
अधिकाऱ्यांचा विश्वास आहे की हे खातं “म्यूल अकाउंट” म्हणून वापरले गेले आहे. म्यूल अकाउंट म्हणजे असे बँक खाते जे एकतर भाड्यानं घेतलं जातं किंवा बनावट/प्रॉक्सी कागदपत्रांच्या आधारावर उघडलं जातं, जेणेकरून अवैध पैसा वारंवार वेगवेगळ्या खात्यांमध्ये फिरवता येईल.
प्राथमिक तपासात ईडीला आढळलं की ड्रायव्हरच्या खात्यात जमा झालेली बहुतेक रक्कम अनेक अज्ञात स्रोतांकडून आली आणि त्वरित इतर संशयास्पद खात्यांमध्ये पाठवली गेली. यापैकी किमान एका स्रोताचा थेट संबंध अवैध ऑनलाइन बेटिंगशी आहे. इतर स्रोत आणि अंतिम लाभार्थींची ओळख पटवण्याची प्रक्रिया सध्या सुरू आहे.