बुस्टरपंप जळाल्याने खामगाव शहराचा पाणीपुरवठा विस्कळीत

Water supply of Khamgaon city गत तीन दिवसांपासून खामगाव शहराचा पाणीपुरवठा विस्कळीत झाला आहे. 

लोकमत न्यूज नेटवर्क
खामगाव : शहराला पाणीपुरवठा करणाऱ्या वामननगरातील टाकीवरील बूस्टरपंप सोमवारी जळाला. त्यामुळे गत तीन दिवसांपासून खामगाव शहराचा पाणीपुरवठा विस्कळीत झाला आहे. 
वाढीव पाणीपुरवठा योजनेची प्रतीक्षा कायम असतानाच, दुसरीकडे कार्यान्वित असलेली योजनाही कुचकामी ठरत असल्याचे दिसून येते.
खामगाव शहरातील पाणीसमस्या सोडविण्यासाठी महत्त्वाकांक्षी असलेल्या वाढीव पाणीपुरवठा योजनेचे काम गत ११ वर्षांपासून अतिशय संथगतीने सुरू आहे. 
गत साडेचार वर्षांच्या कालावधीत या योजनेला गती देण्यासाठी, तसेच पूर्णत्वास नेण्यासाठी पालिका प्रशासनाने कोणतीही ठोस पावले उचलली नाहीत, तर काही ठिकाणी जुन्या पाइपलाइनवरच वाढीव पाणीपुरवठा योजनेंतर्गत नळांची जोडणी केली आहे.
 परिणामी, शहरात कार्यान्वित असलेल्या पाणीपुरवठा योजनेवरील ताण वाढला आहे.

पाणीपुरवठा पुन्हा लांबणीवर!
वामननगरात टाकीवरील बूस्टरपंप जळाल्याने हिरानगर, तलाव रोड, चांदमारी, शेगावनाका, लक्ष्मी बाग परिसरातील पाणीपुरवठा खंडित झाला आहे. पाणीवाटपाचे रोटेशन बिघडल्याने नागरिकांना आता ११व्या दिवशीपर्यंत पाणीपुरवठ्याची प्रतीक्षा करावी लागणार आहे. शहराला पाणीपुरवठा करणाऱ्या जलस्रोतात मुबलक साठा असतानाही, नगरपालिका प्रशासन नियमित पाणी वितरण करण्यास कुठेतरी कमी पडत असल्याची चर्चा आहे.