अभिनेत्री रेखा यांना आहेत तब्बल ६ बहिणी, या क्षेत्रात आहेत त्या तरबेज

अभिनेत्री रेखा यांना सहा बहिणी आहेत. त्यातील एक अभिनेत्री आहे.

सौंदर्याची राणी, दिलखेचक अदांनी घायाळ करणारी, तरूण अभिनेत्रींना लाजवेल असा उत्साह आणि दिवसागणिक चिरतरूण होणाऱ्या अभिनेत्री म्हणजे बॉलीवूड दिवा रेखा. सौंदर्य, अभिनय आणि गुणवत्तेच्या जोरावर त्यांनी हिंदी चित्रपटसृष्टीत मोठी मजल मारली. रेखा यांनी आजवर १८० पेक्षा जास्त सिनेमात काम केले आहे. त्यांच्या प्रत्येक भूमिकेत त्यांनी आपलं वेगळेपण सिद्ध् केले आहे. रेखा यांच्याबद्दल जाणून घेण्यासाठी त्यांचे चाहते खूप उत्सुक असतात. कायम आपलं खासगीपण जपणाऱ्या रेखाच्या आयुष्याबद्दल जाणून घ्यायला तिच्या चाहत्यांना आवडतं. 

रेखा सध्या चित्रपटात पहायला मिळत नसल्या तरी त्या टेलिव्हिजनवरील शोज व पुरस्कार वितरण कार्यक्रमात नेहमी पहायला मिळतात. पूर्वी सगळे त्यांच्या सौंदर्याचे दीवाने होते. तसेच आतादेखील त्या तितक्याच सुंदर दिसतात. त्यांचं ग्लॅमर अजूनही कमी झालेलं नाही.

रेखा तारूण्यात त्यांच्या अफेयरमुळे खूप चर्चेत आल्या होत्या. तसेच त्यांचे लग्न झालं पण ते टिकू शकलं नाही. रेखा सध्या एकटीच मुंबईत राहत असली तरी तिचं कुटुंब हे मोठं आहे. तिला सहा बहिणी असून त्या सर्व आपापल्या क्षेत्रात यशस्वी आहेत. रेखा यांनी अतिशय कमी वयात चित्रपटांमध्ये कामाला सुरुवात केलीय आणि त्यांच्या बहिणींनाही त्यांनी मदत केली आहे.

रेखा यांचे वडिल जेमिनी गणेशन हे तामिळ चित्रपटसृष्टीतले एक दिग्गज होते. त्यांची तीन लग्न झाली. त्यांना पहिल्या पत्नीपासून चार, दुसऱ्या पत्नीपासून रेखा आणि राधा या दोन मुली, तिसऱ्या पत्नीपासून विजया चामुंडेश्वरी आणि मुलगा सतीश. रेखा यांचं आणि त्यांच्या वडिलांचं फारसं पटलं नाही. मात्र त्यांच्या सर्व भावंडांसोबत त्यांचं चांगलंच मेतकूट जमतं. त्यांच्या सहा बहिणींची नावं अशी आहेत जया श्रीधर, नारायणी गणेशन, विजया चामुंडेश्वरी, रेवती स्वामीनाथन, राधा उस्मान सैयद आणि कमला सेल्वराज.

रेवती स्वामीनाथन ही रेखा यांची सर्वात मोठी बहिण आहे. ती अमेरिकेत डॉक्टर आहे. रेखा यांची दुसरी बहिण कमला सेल्वराज भारतातली विख्यात डॉक्टर आहे. त्यांचं चेन्नईत हॉस्पिटल आहे. रेखा यांची तिसऱ्या क्रमांकाची बहिण आहे नारायणी गणेश ती आघाडीच्या वृत्तपत्रात स्तंभलेखिका आहे.  रेखाची सख्खी बहिण राधाही एक अभिनेत्री असून तिने लग्नानंतर चित्रपटात काम करणं बंद केलं. या सगळ्याच बहिणी आपापल्या क्षेत्रात प्रसिद्ध असून रेखा यांना कायम आपल्या बहिणींचं कौतुक असतं.