आंतरवाली शिवारात संशयास्पद अवस्थेत शेतकऱ्याचा मृतदेह आढळला

१५ सप्टेंबरपासून होते बेपत्ता

गेवराई (बीड ) : तालुक्यातील आंतरवाली शिवारात एका ५३ वर्षीय शेतकऱ्याचा मृतदेह संशयास्पद स्थितीत आढळून आला. हरिभाऊ श्रीरंग बुधणर असे मृत शेतकऱ्याचे नाव असून ते विठ्ठलनगर देवकी येथील रहिवासी होते. शनिवारी दुपारी शिवारातील उजव्या कालव्या शेजारी बाभळीत त्यांचा मृतदेह आढळून आला. 

याबाबत अधिक माहिती अशी की, हरिभाऊ श्रीरंग बुधनर हे शेतकरी व मुकादम म्हणून काम करत असत. हरिभाऊ 15 सप्टेंबर पासून घरातून बेपत्ता होते. नातेवाईकांनी शोध घेतला असता ते आढळून आले नाहीत. यामुळे आज सकाळी त्यांच्या बेपत्ता होण्याची तक्रार गेवराई पोलिस ठाण्यात करण्यात आली होती. यानंतर आंतरवाली शिवारातील उजव्या कालव्यात त्यांचा मृतदेह आढळून आला. हरिभाऊ यांचा मृतदेह शर्टने हात बाधंलेल्या व एका बाभळीला अडकलेल्या अवस्थेत आढळला. यामुळे त्यांनी आत्महत्या केली की त्यांचा खून झाला हे समजू शकले नाही. 

तलवाडा पोलीस ठाण्याचे प्रभारी अधिकारी सहायक पोलीस निरीक्षक सुरेश उनवणे यांनी तेथे जाऊन पाहणी केली. मृतदेहाचे जागेवरच शवविच्छेदन करण्यात आले. शवविच्छेदन अहवालानंतर पुढील कारवाई केली जाईल असे पोलीसांनी सांगितले.