दोन मित्रांचा बहिणीकडे आलेल्या ४५ वर्षीय महिलेवर अत्याचार; औरंगाबादमधील धक्कादायक घटना

फुलंब्री : तालुक्यातील वाहेगावात बहिणीकडे आलेल्या एका ४५ वर्षीय महिलेवर गावातील दोन तरुणांनी बलात्कार केल्याची घटना पुढे आली. याप्रकरणी पीडित महिलेच्या तक्रारीवरून वडोदबाजार पोलिसांनी शुक्रवारी रात्री गुन्हा नोंदवून दोघांना अटक केली.

तालुक्यातील नायगावच्या ४५ वर्षीय महिला १७ मे रोजी वाहेगावात आपल्या बहिणीकडे एका कार्यक्रमासाठी आल्या हाेत्या. रात्रीला ११ वाजेच्या दरम्यान वाहेगाव ते निधोना रस्त्यावर जात असताना दोन तरुण दुचाकीवर आले व त्यांनी बळजबरीने संबंधित महिलेस दुचाकीवर बसवून परिसरातील शेतात नेऊन अत्याचार केल्याची तक्रार पीडित महिलेने वडोदबाजार पोलिसात दिली. त्यानुसार पोलिसांनी दोघांविरुद्ध गुन्हा दाखल केला आहे.

रामेश्वर जाधव, मोहसीन शेख (रा. वाहेगाव) अशी आरोपींची नावे आहेत. महिलेवर अत्याचार करणारे दोन्ही आरोपी २० ते २२ वर्षे वयोगटातील असून निधोना परिसरातील एका ढाब्यावर वेटर म्हणून कामाला आहे. तपास सहायक पोलीस निरीक्षक आरती जाधव यांच्या मार्गदर्शनाखाली पिंक पथकाच्या पोलीस उपनिरीक्षक कुंभारे करीत आहेत.