कार अपघातात डॉक्टरांचा मृत्यू, पाच जणांचा जखमी; वलगाव मार्गावरील घटना

अमरावती-वलगाव मार्गावरील कल्पदीप मंगल कार्यालयानजीक रहाटगाव रिंगरोडवर गुरुवारी सायंकाळी हा अपघात घडला.

अमरावती/पथ्रोट : पथ्रोट (ता. अंजनगाव सुर्जी) येथून अमरावतीला येत असलेल्या डॉक्टरांच्या कारपुढे आलेल्या मुलाला वाचविण्याच्या प्रयत्नात स्टेअरिंंग लॉक झाल्याने कार रस्त्याच्या कडेला खड्ड्यात उलटली. या अपघातात एका डॉक्टरचा मृत्यू झाला, तर त्यांचे पाच सहकारी जखमी झाले. 

अमरावती-वलगाव मार्गावरील कल्पदीप मंगल कार्यालयानजीक रहाटगाव रिंगरोडवर गुरुवारी सायंकाळी हा अपघात घडला. डॉ. श्रीधर अडगोकार (६०, रा. पथ्रोट) असे मृताचे नाव आहे. जखमींमध्ये डॉ. संजय उत्तम तिखिले (५०), डॉ. घनश्याम गिल्डा (५८), डॉ. विश्वनाथ नारायण कविटकर (५८, सर्व रा. पथ्रोट) तसेच डॉ. विलास कविटकर (५५, रा. अंजनगावसुर्जी), डॉ. प्रभाकर टेहरे (६५, रा. परसापूर) यांचा समावेश आहे. 

एमएच २७ बीई ०१६१ क्रमांकाची कार चालवित असलेले डॉ. विश्वनाथ कविटकर हे गंभीर जखमी झाले. इतरांना किरकोळ जखमा आहेत. त्यांच्यावर खासगी हॉस्पिटलमध्ये उपचार सुरू आहेत. सदर डॉक्टर पीडीएमसी हॉस्पिटल येथे व्यावसायिक कामासाठीचे अर्ज दाखल करण्यासाठी येत होते, अशी माहिती नातेवाइकांनी दिली.

अमरावतीला पोहोचण्यापूर्वी वाटेतच हा अपघात झाला. डॉ. श्रीधर अडगोकार यांना हॉस्पिटलमध्ये आणले असता, डॉक्टरांनी त्यांना मृत घोषित केले. त्यांचा मृतदेह जिल्हा सामान्य रुग्णालयाच्या शवविच्छेदनगृहात पाठविण्यात आला. गाडगेनगर पोलिसांनी घटनास्थळाचा पंचनामा केला.