तांत्रिक बिघाडात शिक्षण समितीची ऑनलाइन सभा स्थगित !

अकोला : जिल्हा परिषद शिक्षण समितीची ऑनलाइन सभा गुरुवारी आयोजित करण्यात आली होती. मात्र, तांत्रिक बिघाडामुळे ऑनलाइन सभेत सहभागी झालेल्या पदाधिकारी व सदस्यांना परस्परांचा आवाज ऐकू येत नसल्याने शिक्षण समितीची सभा स्थगित करण्यात आली असून, सोमवारी ऑफलाइन पद्धतीने सभा घेण्याचे ठरविण्यात आले.

जिल्हा परिषद शिक्षण समितीची सभा ऑनलाइन पद्धतीने १७ जून रोजी आयोजित करण्यात आली होती. जिल्हा परिषद उपाध्यक्ष तथा शिक्षण सभापती सावित्री राठोड, सदस्य आम्रपाली खंडारे, प्रगती दांदळे, गणेश बोबडे, रिजवाना परवीन, वर्षा वझिरे यांच्यासह शिक्षण विभागाचे संबंधित अधिकारी सभेत सहभागी झाले होते. समितीची ऑनलाइन सभा सुरू झाल्यानंतर सभेत सहभागी पदाधिकारी, सदस्य आणि अधिकाऱ्यांचा आवाज एकमेकांना ऐकू येत नव्हता. तांत्रिक बिघाडामुळे सभेत सहभागी सदस्यांकडून तांत्रिक बिघाडामुळे सभेत सहभागी सदस्यांचा आवाज येत नसल्याने, शिक्षण समितीची सभा स्थगित करण्यात आली. ही सभा सोमवार, २१ जून रोजी ऑफलाइन पद्धतीने घेण्याचे यावेळी ठरविण्यात आले.