शिर्डी विमानतळावरून लवकरच आंतरराष्ट्रीय उड्डाणे

साईबाबा आंतरराष्ट्रीय विमानतळावरून आंतरराष्ट्रीय विमानसेवेसाठी नवीन टर्मिनल व कार्गो सेवा सुरू करण्यासाठी येत्या एप्रिलपासून काम सुरू होईल,

शिर्डी : साईबाबा आंतरराष्ट्रीय विमानतळावरून आंतरराष्ट्रीय विमानसेवेसाठी नवीन टर्मिनल व कार्गो सेवा सुरू करण्यासाठी येत्या एप्रिलपासून काम सुरू होईल, अशी माहिती महाराष्ट्र विमानतळ विकास कंपनीचे व्यवस्थापकीय संचालक सुरेश काकाणी यांनी दिली़
राज्यात मुंबई, पुणे, नागपूरनंतरचे शिर्डी चौथे तसेच देशातील वेगाने वाढणारे एकमेव विमानतळ ठरले असल्याचे काकाणी यांनी सांगितले़ धावपट्टीबरोबरच टर्मिनलचा विस्तार करण्यात आला आहे. अत्याधुनिक रडार यंत्रणा बसविण्यात आली आहे़ विमानतळावर वीज निर्मितीसाठी सोलर प्लॅन्ट बसविण्यात आला आहे. परिसरातील विहिरींचे पुनर्भरण करण्यात आले आहे़ नोव्हेंबरमध्ये नाईट लँडिंगचे काम पूर्ण होऊन डिसेंबरअखेर यासाठी परवाना मिळेल. आंतरराष्ट्रीय विमानसेवेसाठी नवीन टर्मिनल व शेतमालासाठी कार्गो सेवा सुरू करण्याचा कंपनीचा प्रयत्न आहे़ यासाठी २०० कोटींचा आराखडा बनविला आहे. एप्रिलमध्ये काम सुरू होईल, असे काकाणी यांनी सांगितले़
शिर्डी विमानतळावर विमान पार्किंगची क्षमता चारवरून अकरापर्यंत वाढविण्यात येत आहे़ येथे इंधन भरण्याचीही सुविधा आहे. एप्रिलपासून मुंबईत विमान उतरवणे शक्य नसेल तेव्हा तेथील विमाने शिर्डीत वळविण्यात येतील़ सध्या ही विमाने अहमदाबाद येथे नेण्यात येतात़ आंतरराष्ट्रीय सुविधा निर्माण करेपर्यंत सध्याही पंधरा दिवस आगाऊ परवानगी काढून विदेशातून येणारी खासगी विमाने येथे उतरु शकतील़, असेही काकाणी यांनी म्हणाले.
>रोज चाळीस विमानांचे उड्डाण होणार
सध्या देशांतर्गत सेवा वाढवण्यावर भर आहे. दोन वर्षापूर्वी चार विमानाने सुरू झालेल्या या विमानतळावर आता रोज अठ्ठावीस उड्डाणे होत आहेत़ येत्या दोन महिन्यांत ही संख्या चाळीसपर्यंत नेण्याचा प्रयत्न आहे़ यात शिर्डी-तिरुपती देवस्थानांना जोडणाऱ्या सेवेचाही समावेश असेल़ दोन वर्षांत पाच लाख प्रवाशांनी शिर्डी विमानसेवेचा लाभ घेतला़ या वर्षात हा आकडा सात लाखांवर नेण्याचा मानस आहे. पुढील वर्षी हा आकडा चौदा लाखांवर नेण्याचा कंपनीचा संकल्प असल्याचे काकाणी यांनी सांगितले़