पोलीस कर्मचाऱ्यांच्या प्रसंगावधानाने रस्ता लूट टळली
By लोकमत न्यूज नेटवर्क | Published: July 26, 2021 04:21 AM2021-07-26T04:21:43+5:302021-07-26T04:21:43+5:30
कर्जत : नगर-सोलापूर महामार्गावर बनपिंपरी ते घोगरगाव दरम्यान ट्रक चालकाला लुटण्यासाठी लुटारूंची टोळी तयार होती. परंतु, वकील, पोलीस, चालक ...
कर्जत : नगर-सोलापूर महामार्गावर बनपिंपरी ते घोगरगाव दरम्यान ट्रक चालकाला लुटण्यासाठी लुटारूंची टोळी तयार होती. परंतु, वकील, पोलीस, चालक यांनी दाखविलेल्या प्रसंगावधानामुळे रस्ता लुटीचा प्रसंग टळला. कर्जतकरांनी दाखविलेल्या प्रसंगावधानाचे पोलीस निरीक्षक चंद्रशेखर यादव यांनी कौतुक केले.
शुक्रवारी (दि.२३) रात्री अकराच्या सुमारास पोलीस हेड कॉन्स्टेबल पांडुरंग भांडवलकर, ॲड. शुभम दीपक भंडारी, चालक सुशील देवगिरी आणि त्यांच्या सोबत असणारे तिघे जण हे सर्व न्यायालयाच्या कामानिमित्त नगर आणि नंतर श्रीरामपूरला गेले होते. सर्व काम आटोपून नगरवरून कर्जतकडे निघण्यास त्यांना उशीर झाला. कर्जतच्या दिशेने येत असताना बनपिंपरी-घोगरगावच्या मध्ये नगरच्या दिशेने थांबलेला ट्रक (केए ५६ बीझेड २३७५) आणि ट्रकच्या पुढे नंबर नसलेली दुचाकी थांबलेली दिसली. त्यावेळी पांडुरंग भांडवलकर यांनी चालक सुशील देवगिरी यांना वाहन थांबविण्यास सांगितले. वाहन थांबताच दुचाकीवरील व्यक्ती म्हणाला ‘जाऊ द्या, जाऊ द्या काही नाही’ पण भांडवलकर यांना शंका आली.
त्यांनी ट्रकचे निरीक्षण केले. त्यांना ट्रकमध्ये क्लिनर आणि चालकाच्या बाजूने दोघे जण असल्याचे दिसले. पोलीस कर्मचारी भांडवलकर वाहनातून उतरून दुचाकीकडे गेले. ट्रकमधून एक जण उतरला. त्याच्या हातात धारदार शस्त्र दिसताच ॲड. शुभम भंडारीही वाहनातून उतरले व चालकाला वाहन वळवा असे सांगितले. ते पाहता लुटारू दुचाकीवर बसला. त्यानंतर तिसरा लुटारूही पळत येऊन दुचाकीवर बसताच ते वेगाने नगरच्या दिशेने निघून गेले. नंतर त्यांनी ट्रक चालकाला धीर देत जवळ असणाऱ्या हॉटेलमध्ये थांबण्यास सांगितले. त्यामुळे लुटीचा प्रसंग टळला.