नितीन अणवेकरांकडे अठराव्या शतकापासूनच्या पत्रांचा अमूल्य ठेवा

सोलापूर - हा छंद जीवाला लावी पिसे म्हणतात, ते काही खोटे नाही. टपालातून आलेली पत्रे वाचल्यावर सर्वांच्याच दृष्टीने तशी क्षुल्लकच. मात्र सोलापुरातील नितीन कृष्णानंद अणवेकर या तरूणाने मात्र या रद्दी झालेल्या पत्रातच वैभव शोधले आहे. जाईल तिथून जुनी पत्रे शोधणाऱ्या या युवकाच्या संग्रही आज दीड हजारांवर पत्रे असून अठराव्या शतकापासून तर थेट कालपरवापर्यंत माजी राष्ट्रपती अब्दुल कलाम आणि अटलबिहारी वाजपेयी यांच्या पत्रांचा दुर्मिळ खजिना त्याने जोपासला आहे.