जमिनीवर डोकं ठेचून व्यसनी पतीने केली पत्नीची हत्या

संशयित वृतीच्या आणि दारूचे व्यसन असलेल्या पतीने पत्नीची निर्घृण हत्या केली. ही घटना कारला चौक परिसरात बुधवारी रात्री उशिरा घडली आहे.

वर्धा - संशयित वृतीच्या आणि दारूचे व्यसन असलेल्या पतीने पत्नीची निर्घृण हत्या केली. ही घटना कारला चौक परिसरात बुधवारी रात्री उशिरा घडली आहे.  रेखा देवराव मोहिजे (५०) असे हत्या करण्यात आल मृतक महिलेचे नाव आहे. बुधवारी रात्री १० वाजण्याच्या सुमारास मुलगी घरी परतल्यानंतर ही घटना तिच्या निदर्शनास आली. त्यानंतर रामनगर पोलिसांना माहिती देण्यात आली. घटनेनंतर आरोपी पती देवराव मोहिजे याने घटना स्थळावरुन यशस्वी पळ काढला. या प्रकरणी रामनगर पोलिसांत मनुष्यवधाचा गुन्हा दाखल करण्यात आला असून आरोपीच्या शोधार्थ पोलिसांच्या तीन चमू रवाना झाल्या आहेत. आरोपी आणि मृतक यांच्यात नेहमी छोट्या-छोट्या करणावरुन भांडण होत होते. सन २०१६ मध्ये मृतकाच्या तक्रारीवरुन  देवराव मोहिजे यांच्याविरुद्ध भादंविच्या ३२४ अन्वये पोलीस ठान्यात गुन्हाही दाखल करण्यात आला होता. 

बुधवारी छोट्याशा कारणावरुन झालेला वाद विकोपाला जाऊन त्याचे हाणामारीत रूपांतर झाले. याच वेळी आरोपीने रेखाचे डोके जमिनीवर ठेचून तिची हत्या केली असावी, असे पोलिसांच्या आतापर्यंतच्या तापसात पुढे आले आहे. पुढील तपास रामनगर पोलीस करीत आहेत.