गोंधळ घालण्यास मज्जाव केल्याने पोलीस कर्मचाऱ्यास बेदम मारहाण

आरडओरड करीत घराबाहेरील साहित्याची जाळपोळ करण्यास मज्जाव केला

उस्मानाबाद : आरडओरड करीत घराबाहेरील साहित्याची जाळपोळ करण्यास मज्जाव केल्याचा राग धरून पोलीस कर्मचाऱ्यास मारहाण केल्याची घटना तालुक्यातील कौडगाव येथे बुधवारी सकाळी १० वाजेच्या सुमारास घडली. या प्रकरणी उस्मानाबाद ग्रामीण पोलीस ठाण्यात गुन्हा नोंद करण्यात आला आहे.

याबाबत पोलिसांकडून मिळालेली अधिक माहिती अशी की, कौडगाव येथील पांडुरंग लिंबा कांबळे हा बुधवारी सकाळी साधापणे दहा वाजेच्या सुमारास स्वत:च्या घरासमोर मोठमोठ्याने आरडाओरड करून शिवीगाळ करीत होता. तसेच घरासमोर पडलेल्या साहित्याची जाळपोळही करीत होता. सदरील प्रकाराची माहिती मिळाल्यानंतर पोकॉ. सुनील डोईबळे हे सहकाऱ्यांसोबत गावात पोहोचले.

त्यांनी कांबळे यास आरडाओरड करण्यास मज्जाव केला असता, ‘तुम्ही पोलीस माझे काय करणार’, असे म्हणत पोकॉ. डोईबळे यांना लाथाबुक्यांनी मारहाण केली. तसेच डाव्या हातावर चावा घेत काठीने डोक्यात मारून जमखी केले. या प्रकरणी पोकॉ. डोईबळे यांनी दिलेल्या फिर्यादीवरून उस्मानाबाद ग्रामीण पोलीस ठाण्यात पांडुरंग लिंबा कांबळे याच्याविरूद्ध भादंविचे कलम ३५३, ३३२, ३३३, ५०४ व ५०६ अन्वये गुन्हा दाखल करण्यात आला आहे. घटनेचा अधिक तपास पोलीस करीत आहेत.