विमान प्रवासात सन्मान द्या आणि आनंद घ्या!

By लोकमत न्यूज नेटवर्क on Thu, November 09, 2017 6:43pm

फ्लाइट अटेन्डन्टशी नीट सहकार्यानं आणि शिष्टाचारानं वागून तुम्ही तुमचा विमान प्रवास अधिक सुखकारक बनवू शकता. ‘जेटब्ल्यू ’या आंतरराष्ट्रीय विमानकंपनीत फ्लाइट अटेन्डन्ट असलेल्या अमान्डा प्लेवा हिनं त्यासाठी काय करायला हवं यावर एक सविस्तर ब्लॉगच लिहिला आहे.

- अमृता कदम वेळेची बचत आणि आरामदायी प्रवास यामुळे आजकाल विमानप्रवासालाच पसंती दिली जाते. विमानप्रवासात हवाई सुंदरींकडून मिळणारी अदबशीर वागणूक हे विमानप्रवासातल्या कम्फर्टचं एक महत्त्वाचं कारण. प्रवाशांना उत्तम सेवा देण्यासाठी आणि आपल्या विमानकंपनीचा नावलौकिक जपण्यासाठी या फ्लाइट अटेन्डन्ट नेहमीच खूप मेहनत घेत असतात. बहुधा त्यामुळेच अनेक जण त्यांना गृहीत धरतात आणि त्यांनी आपली अगदीच ताबेदारीच करावी अशी अपेक्षा ठेवतात. पण तसं न करता फ्लाइट अटेन्डन्टशी नीट सहकार्यानं आणि शिष्टाचारानं वागून तुम्ही तुमचा प्रवास अधिक सुखकारक बनवू शकता. ‘जेटब्ल्यू ’या आंतरराष्ट्रीय विमानकंपनीत फ्लाइट अटेन्डन्ट असलेल्या अमान्डा प्लेवा हिनं त्यासाठी काय करायला हवं यावर एक सविस्तर ब्लॉगच लिहिला आहे.

 

तिनं आपल्या या पोस्टमध्ये लोकांकडून येणारे उद्धटपणाचे अनुभव आणि इतरही अडचणींबद्दल सविस्तरपणे लिहिलं आहे. ‘माझ्या कामातला सगळ्यांत वाईट भाग कोणता आहे माहितीये? लोकांचं खाणं उचलणं किंवा अत्यंत रागारागानं भांडणा-या प्रवाशाला समजावणं असं जर तुम्हाला वाटत असेल तर ते चुकीचं आहे. मी दारात उभी राहून लोकांचं स्वागत करतीये आणि माझ्या तोंडाकडेही न बघता माझ्या अभिवादनाकडे सपशेल दुर्लक्ष करु न जेव्हा लोक जातात तेव्हा खूप अपमानास्पद वाटतं.’’ फर्स्ट क्लास आणि बिझनेस क्लासमधल्या लोकांना इकॉनॉमी क्लासमधल्या लोकांपेक्षा जास्त चांगली वागणूक दिली जाते, अशी टीका करणारा एक लेख प्रसिद्ध झाल्यानंतर प्लेवानं हा ब्लॉग लिहिला. फर्स्ट क्लास आणि बिझनेस क्लासमधल्या लोकांना वेगळी ट्रीटमेण्ट मिळते, हे प्लेवानं नाकारलं नाहीये. पण त्याचबरोबर आत येताना आमच्या अभिवादनाला हसून ‘हॅलो’ म्हणून प्रतिसाद देणा-या ब-याचशा प्रवाशांमध्ये फर्स्ट क्लासचेच प्रवासी असतात हेसुद्धा तिनं आवर्जून नमूद केलं आहे. ‘बिझनेस क्लासमधून प्रवास करणा-या प्रवाशांची संख्या मुळातच मर्यादित असल्यामुळे त्यांच्यासोबत वैयक्तिक संपर्क ठेवणं सोपं जातं. पण इकॉनॉमी क्लासमध्ये जास्त प्रवासी असल्यामुळे फ्लाइट अटेण्डन्टला त्या प्रत्येकाजवळ जाऊन बोलणं शक्य होत नाही. जेव्हा लोकं अशा बिनचेह-याच्या गर्दीचा भाग नसतात, तेव्हा त्यांचं वागणं वेगळं असतं,’ असंही तिनं आपल्या ब्लॉगमध्ये म्हटलं आहे. इकॉनॉमी क्लासमधल्या सगळ्यांशीच फ्लाइट अटेन्डण्ट संवाद साधू शकत नसल्या तरी प्रवाशांनी थोडासा विनम्रपणा आणि शिष्टाचार दाखवला तर त्यांचं काम सहज होऊन जातं. ‘आमच्या काही लक्षात येत नाही असं तुम्हाला वाटत असेल. पण आम्ही प्रवाशांचं वागणं पाहात असतो. तुम्हाला त्याची पावतीही आमच्या वागण्यातून देतो. कधीमधी एखादं फ्री ड्रिंक, तुम्हाला आरामदायी मोकळ्या सीटवर बसायला देणं किंवा तुम्ही बेल वाजवण्याच्या आतच तुम्हाला काय हवं नको त्याची विचारपूस करणं असं काही ना काही आम्ही करतच असतो. अदबशीर वागणारे विमानप्रवासी फ्लाइट अटेन्डण्टच्या कायम लक्षात राहतातच,’ प्लेवानं ही गोष्ट आवर्जून नमूद केलीये. आणि प्रवाशांनी नेमकं कसं वागायचं याची हिंटही दिली आहे. त्यामुळेच भलेही तुम्ही इकॉनॉमी क्लासनं प्रवास करत असलात तरी बोर्ड करताना फ्लाइट अटेन्डन्टच्या ‘हॅलो’ला स्मितहास्याच्या रूपात प्रत्युत्तर द्यायला विसरु नका.

संबंधित

साताऱ्यातील या निसर्गसुंदर पर्यटनस्थळांंना नक्की भेट द्या
या तरुणाने घेतली मुंबईकर महिलांच्या सुरक्षिततेची शपथ
विनापैसे देशभर फिरल्याचा या विद्यार्थ्याचा दावा
मेघदूत अर्थात छत्रीतला सखा...
पाण्यातून, दुधातून रोज हळद घेताय, मग आधी हळदीचे दुष्परिणाम वाचाच. थोडी काळजी घेतली तर हे दुष्परिणाम टाळता येतात.

ट्रॅव्हल कडून आणखी

प्रवासाची बॅग भरताना अजूनही तुमची धांदल उडते?
इतिहासाचं वैभव अनुभवायचं असेल तर हम्पीला जायलाच हवं!
2018मध्ये कुठे फिरायला जायचं ते आताच ठरवा.
फॅशन फ्रीक असाल तर या फॅशनेबल सीटी कधीतरी पाहायलाच हव्यात!
विमानतळावर सामान हरवू शकतं. ते परत मिळवण्यासाठी या पाच गोष्टी लक्षात ठेवा!

आणखी वाचा