Wimbledon 2018 : फेडररचा सलग दुसरा विजय
By ऑनलाइन लोकमत | Published: July 4, 2018 10:31 PM2018-07-04T22:31:06+5:302018-07-04T22:32:07+5:30
दिग्गज रॉजर फेडररने अपेक्षित कामगिरी करताना स्लोवाकियाच्या लुकास लॅको याचा सरळ तीन सेटमध्ये धुव्वा उडवत विम्बल्डन स्पर्धेच्या तिस-या फेरीत धडक मारली. केवळ १ तास ३० मिनिटांमध्ये बाजी मारताना फेडररने लॅकोला टेनिसचे धडेच दिले. त्याचवेळी, महिला गटामध्ये माजी विजेती मारिया शारापोवाचे आव्हान पहिल्याच फेरीत संपुष्टात आले.
Wimbledon 2018 : फेडररचा सलग दुसरा विजय
Next
ठळक मुद्देमारिया शारापोवा पहिल्याच फेरीत गारद
लंडन : दिग्गज रॉजर फेडररने अपेक्षित कामगिरी करताना स्लोवाकियाच्या लुकास लॅको याचा सरळ तीन सेटमध्ये धुव्वा उडवत विम्बल्डन स्पर्धेच्या तिस-या फेरीत धडक मारली. केवळ १ तास ३० मिनिटांमध्ये बाजी मारताना फेडररने लॅकोला टेनिसचे धडेच दिले. त्याचवेळी, महिला गटामध्ये माजी विजेती मारिया शारापोवाचे आव्हान पहिल्याच फेरीत संपुष्टात आले.
How many times have we seen this before?@rogerfederer seals his third round spot at #Wimbledon with a textbook forehand pic.twitter.com/Y6SglG1qJN
— Wimbledon (@Wimbledon) July 4, 2018
विश्वविक्रमी २१व्या ग्रँडस्लॅम आणि नवव्या विम्बल्डन जेतेपदाच्या प्रयत्नात असलेल्या फेडररने ग्रास कोर्टवरील आपला दबदबा पुन्हा एकदा सिद्ध करताना दिमाखदार विजय मिळवला. त्याने लॅकोचे आव्हान ६-४, ६-४, ६-१ असे सहजपणे परतावले. एकतर्फी झालेल्या या सामन्यात फेडररने तब्बल १६ एस मारताना लॅकोवर पूर्ण वर्चस्व मिळवले. त्याउलट लॅकोला केवळ ६ एस मारण्यात यश आले. शिवाय दबावाखाली आल्यानंतर लॅकोकडून चारवेळा डबल फॉल्टही झाले. फेडररच्या झंझावातापुढे लॅकोला आव्हानही उभे करता आले नाही.
कॅनडाच्या मिलोस राओनिच यानेही अपेक्षित आगेकूच करताना आॅस्ट्रेलियाच्या जॉन मिलमॅनचे आव्हान ७-६(७-४), ७-६(७-४), ७-६(७-४) असे परतावले. सर्बियाचा दिग्गज खेळाडू नोव्हाक जोकोविच यानेही विजयी सलामी देताना अमेरिकेच्या टेनीस सेंडग्रेनचा ६-३, ६-१, ६-२ असा पराभव केला.
महिलांमध्ये रशियाच्या मारिया शारापोवाला आपल्याच देशाच्या वितालिया दियाचेनको हिच्याविरुद्ध पराभूत व्हावे लागले. तीन तासांहून अधिक वेळ रंगलेल्या या अटीतटीच्या लढतीत वितालियाने स्टार खेळाडू शारापोवाला ६-७(३-७), ७-६(७-३), ६-४ असा धक्का दिला. गेल्या आठ वर्षांमध्ये शारापोवाची ग्रँडस्लॅममध्ये ही सर्वात वाईट कामगिरी आहे. माजी विजेती झेक प्रजासत्ताकच्या पेत्रा क्वितोवाचे आव्हानही पहिल्याच फेरीत संपुष्टात आले. तिला बेलारुसच्या अलेक्झांद्रा सासनोविचने ६-४, ४-६, ६-० असे नमविले.
