रायडूचे तडाखेबंद शतक; भारताची त्रिशतकी मजल

  • First Published :10-January-2017 : 17:46:47

  • - रोहित नाईक
    मुंबई, दि. 10 -  अंबाती रायडूचे तडाखेबंद शतक आणि शिखर धवन, युवराज सिंग व कर्णधार महेंद्रसिंग धोनी यांचा अर्धशतकी तडाखा या जोरावर भारत ‘अ’ संघाने पहिल्या सराव सामन्यात इंग्लंड इलेव्हन संघाविरुध्द निर्धारीत ५० षटकात ४ बाद ३०४ धावांचा डोंगर उभारला. भारतीय संघाचे अखेरचे नेतृत्वपद सांभाळलेल्या धोनीने ४० चेंडूत नाबाद ६८ धावा काढताना उपस्थित क्रिकेटचाहत्यांचे चांगलेच मनोरंजन केले. तर, त्याआधी रायडू ९७ चेंडूत १०० धावांची खेळी करुन रिटायर्ड हर्ट झाला.
    मुंबईतील ब्रेबॉर्न स्टेडियमवर सुरु असलेल्या या सामन्यात कर्णधार धोनीचे अखेरचे ‘कूल’ नेतृत्व पाहण्यासाठी मुंबईकरांनी मोठी उपस्थिती दर्शविली. सुरुवातीला  उत्तरेकडील आणि पुर्वेकडील स्टँड खुले केल्यानंतर हळूहळू पश्चिम स्टँडदेखील खुले करण्यात आल्यानंतर स्टेडियम जवळपास भरुन गेले. भारतीयांच्या प्रत्येक चौकारावर जल्लोष होत असला तरी, प्रेक्षकांना प्रतीक्षा होती ती धोनीच्या फटकेबाजीची. त्यामुळेच जेव्हा मनदीप सिंग आणि शिखर धवन बाद झाले तेव्हा प्रेक्षकांनी मोठा जल्लोष केला.
    परंतु, धवननंतर आलेल्या युवराज सिंगने अडखळत्या सुरुवातीनंतर शानदार फटकेबाजी करीत प्रेक्षकांना खुश केले. युवी.. युवी अशा जयघोषानंतर पुन्हा एकदा क्रिकेटप्रेमींना जुना युवराज पाहण्यास मिळाला. त्याने ४८ चेंडूत ६ चौकार व २ षटकार मारत ५६ धावांची दमदार खेळी केली. तर, ४१व्या षटकात रायडूने आपले शतक पुर्ण केल्यानंतर मैदान सोडण्याचा निर्णय घेतला आणि आगमन झाले कर्णधर धोनीचे..
    यावेळी प्रेक्षकांनी धोनीचा जयघोष करीत स्टेडियम दणाणून सोडले. धोनीने देखील आपल्या चाहत्यांना खुश करताना अखेरपर्यंत नाबाद राहत ४० चेंडूत ८ चौकार व २ षटकरांसह ६८ धावा केल्या.
    तत्पुर्वी, नाणेफेक जिंकून इंग्लंड कर्णधार इआॅन मॉर्गन याने क्षेत्ररक्षण स्वीकारल्यानंतर मनदीप सिंग (८) झटपट परतला. मात्र, धवन - रायडू यांनी संघाला सावरताना दुसºया विकेटसाठी १११ धावांची भागीदारी केली. जॅक बॉलने धवनला बाद करुन ही जोडी फोडली. धवन ८४ चेंडूत ८ चौकार व एका षटकारासह ६३ धावा काढून परतला. यानंतर रायडू - युवराज यांनी तिसºया विकेटसाठी ९१ धावांची भागीदारी केली. रायडू शतक झळकावून रिटायर्ड हर्ट झाल्यानंतर युवी, धोनी यांनी भारत ‘अ’ संघाला तीनशेचा पल्ला पार करुन दिला. 
     
    धावफलक :
    भारत  ‘अ’ : मनदीप सिंग त्रि. गो. विली ८, शिखर धवन झे. बटलर गो. बॉल ६३, अंबाती रायडू रिटायर्ड हर्ट १००, युवराज सिंग झे. रशिद गो. बॉल ५६, महेंद्रसिंग धोनी नाबाद ६८, संजू सॅमसन झे. हेल्स गो. विली ०, हार्दिक पांड्या नाबाद ४. अवांतर - ५. एकूण : ५० षटकात ४ बाद ३०४ धावा.
    गोलंदाजी : ख्रिस वोक्स १०-१-७१-०; डेव्हीड विली १०-१-५५-२; मोईन अली १०-०-४२-०; जॅक बॉल १०-०-६१-२; आदिल रशिद ८-०-४९-०; लियाम डॉसन २-०-२४-०.
महत्वाच्या आणि मनोरंजन विश्वातल्या घडामोडी जाणून घेण्यासाठी डाऊनलोड करा लोकमत अॅप: Android | IOS