महामार्गाने दोन तासांनंतर घेतला मोकळा श्वास; दोन क्रेनच्या मदतीने वाहन हटविले

पुणे-बेंगलोर राष्ट्रीय महामार्गावर आनेवाडी टोलनाक्यापासून काही अंतरावर असलेल्या बदेवाडी हद्दीत रविवारी सकाळी चालकाचा ताबा सुटल्याने एक कंटेनर रस्ता दुभाजकाला धडकून रस्त्यावर पलटी झाला

पाचवड (सातारा) : पुणे-बेंगलोर राष्ट्रीय महामार्गावर आनेवाडी टोलनाक्यापासून काही अंतरावर असलेल्या बदेवाडी हद्दीत रविवारी सकाळी चालकाचा ताबा सुटल्याने एक कंटेनर रस्ता दुभाजकाला धडकून रस्त्यावर पलटी झाला. यामुळे पुण्याकडून साता-याकडे जाणारी वाहतूक ठप्प झाली होती. दोन क्रेनच्या मदतीने हा कंटेनर बाजूला केला. त्यामुळे दोन तासांनंतर वाहतूक सुरळीत सुरू झाली.

याबाबत माहिती अशी की, उन्हाळ्याची सुटी त्यातच रविवारची साप्ताहिक सुटी असल्याने पुणे-बेंगलोर राष्ट्रीय महामार्गावर वाहनांचे प्रमाण वाढले आहे. त्यातच रविवारी सकाळी सातारा दिशेने जाणारा कंटेनर (टीएस ०१ बीके ९०७९) या चालकाचा वाहनावरील ताबा सुटल्याने तो दुभाजकास धडक देऊन रस्त्यावर आडवा झाला. अपघातानंतर चालक पळून गेला. त्यानंतर महामार्ग पोलीस व भुईंज पोलीस यांनी महामार्ग क्रेन व मदत पथकाने कुंटेनर बाजूला काढून वाहतूक सुरुळीत केली. तोपर्यंत वाहनचालक व प्रवासी यांना मनस्ताप सहन करावा लागला.