मरणाच्या दारातून वाचविण्याचे समाधान मोठे

पुणे-मुंबई द्रुतगती महामार्गावर अपघातग्रस्तांना मदतीचा हात : पूजा साठीलकरचा तरुणाईपुढे वेगळा आदर्श

युगंधर ताजणे 

पुणे : जिथे रक्ताच्या नात्याची किंमत फारशी उरलेली नसताना दुसरीकडे मोठ्या आपुलकी आणि कर्तव्यदक्ष भावनेतून वेळ आणि प्रसंग कुठला असेना त्या व्यक्तीच्या मदतीला धावून जायचे, हे तत्त्व पूजा साठीलकर ही युवती अमलात आणते. पुणे-मुंबई द्रुतगती महामार्गावर झालेल्या अपघातातील व्यक्तींना तातडीने मदत करणे, त्यांना रुग्णालयात पोहोचविण्याकरिता आवश्यक ती यंत्रणा आपल्या सहकाऱ्यांच्या मदतीने उभारण्याचे काम ती आनंदाने करते. ‘एखाद्या व्यक्तीला मरणाच्या दारातून परत आणून वाचविण्याच्या समाधानाचे मोल मोठे असते,’ या शब्दांत ती आपल्यावरील जबाबदारीची जाणीव करून देते.

सिव्हील इंजिनिअरिंग पूर्ण केल्यानंतर पूजाने दीड वर्ष एका कंपनीत नोकरी केली; मात्र त्यात तिचे मन काही रमले नाही. पुढे इंटेरियर डेकोरेटरचा स्वत:चा व्यवसाय सुरू केला. वडील गुरुनाथ रामचंद्र साठीलकर यांच्या मदतशील स्वभावाचा प्रभाव पूजावर पडला. वडिलांनी सुरू केलेल्या ‘अपघातग्रस्तांच्या मदतीसाठी सामाजिक संस्था’ या नावाने एका व्हॉट्सअ‍ॅप ग्रुपमध्ये ती सहभागी झाली. त्यात रोज येणाºया अपघातांची माहिती घेऊन घटनास्थळी धाव घेणे, जखमींना तातडीने रुग्णालयात दाखल करण्याचे काम ती करू लागली. याकामी तिला तिचा भाऊ शुभम, बहीण भक्ती आणि आई यांची मोठी मदत झाली. या संस्थेकडे ३ रुग्णवाहिका असून त्या पुणे-मुंबई द्रुतगती महामार्गावरील कुठल्याही परिसरात अपघात झाल्यास अपघातस्थळी दाखल होतात. अपघातग्रस्त व्यक्तीला मदत करणे, हा एकमेव उद्देश मनाशी बाळगून ९४ किलोमीटर असलेल्या महामार्गाच्या परिसरात प्रभावीपणे या संस्थेतर्फे काम केले जाते. सध्याच्या सोशल माध्यमांच्या युगात एकमेकांशी यांत्रिकरीत्या संवाद साधण्याची सवय होऊन बसलेल्या पिढीला आपल्या जबाबदारीची जाणीव करून देण्याचे काम पूजा करते. ती म्हणते, ‘‘महामार्गावर अपघात घडल्यानंतर घटनास्थळी रक्त पाहिल्यावर अनेक जण घाबरून जातात. तर, पोलीस कारवाई करतील, या भीतीपोटी अनेकांची गाळण उडते. आपल्यासमोर मरणासन्न अवस्थेत पडलेला व्यक्ती ज्या वेळी मदतीची याचना करते, तेव्हा त्याला सर्वतोपरी सहकार्य करण्याची जबाबदारी तरुणांनी घ्यायला हवी.’’
पूजाचे वडील गुरुनाथ साठीलकर यांनी सांगितले, ‘‘केवळ अपघातापुरते संस्थेचे काम मर्यादित नाही; इतरही कामे केली जातात.’’

नुसतेच फोटो काढण्यासाठी गर्दी नको...
तरुणाई आता नुसतीच मोबाईलमध्ये फोटो काढण्यात व्यस्त असते. आपल्यासमोर झालेल्या अपघातात आपल्याच घरातील असतील, याची शाश्वती आज देता येणार नाही. कपडे, हात, खराब होतील, पोलीस त्रस्त करतील म्हणून कुणाला मदत नाकारू नका. जो प्रसंग त्यांच्यावर आला आहे, तो उद्या तुमच्यावरसुद्धा येऊ शकतो याचे स्मरण तरुणांनी ठेवण्याची गरज आहे.
- पूजा साठीलकर