व्यायामासाठी निघालेल्या पती-पत्नीला कारची धडक ; पत्नीचा जागीच मृत्यु

आजारी पतीला सकाळी फिरण्यासाठी घेउन जाणाऱ्या महिलेचा कारने धडक दिल्याने झालेल्या अपघातात मृत्यु झाल्याची घटना रविवारी (दि ९) सकाळी आठच्या सुमारास घडली.

वडगाव निंबाळकर : आजारी पतीला सकाळी फिरण्यासाठी घेउन जाणाऱ्या महिलेचा कारने धडक दिल्याने झालेल्या अपघातात मृत्यु झाल्याची घटना रविवारी (दि ९) सकाळी आठच्या सुमारास घडली. बारामती तालुक्यातील चोपडज नजीक कानाडवाडी येथे हा अपघात झाला. यामध्ये पती देखील गंभीर जखमी झाला आहे.

    चांगुणा शिवाजी टकले (वय. ४५) असे अपघातात मृत्यू झालेल्या महिलेचे नाव असुन पती शिवाजी मारूती टकले (वय. ६०) (रा. कानाडवाडी ता. बारामती) गंभीर जखमी झाले आहेत. शिवाजी यांना दिड वषार्पासुन अर्धांगवायुचा आजार आहे. पत्नी चांगुणा त्यांना सकाळी कोवळ्या उन्हात घराबाहेर कानाडवाडी मुढाळे मार्गावरून फिरायला घेऊन चालली होती. परत येताना विरूद्ध बाजुने आलेली स्वीफ्ट डिजायर कार (क्रमांक एमएच १२ एचएन ३७९७) ने टकले दांपत्याला ठोकरले. यामध्ये चांगुणा यांचा जागीच मृत्यू झाला तर, पती शिवाजी हे गंभीर जखमी झाले आहेत. त्यांना उपचारासाठी मोरगाव येथील खाजगी रूग्णालयात नेण्यात आले आहे. अपघाताची माहिती मिळताच वडगाव निंबाळकर पोलीस ठाणेचे सहाय्यक पोलीस निरिक्षक समाधान चवरे घटनास्थळाकडे धाव घेतली. कार चालक अद्याप निष्पन्न झाला नसून याप्रकरणी गुन्हा दाखल करण्याचे काम सुरू आहे.