तिकीट मागताना गाड्या भरून कार्यकर्ते कुठून येतात : अजित पवारांची गुगली 

अजित पवार त्यांच्या रोखठोक शैलीसाठी प्रसिद्ध आहेत. पुण्यात राष्ट्रवादी काँग्रेसच्या नियोजन बैठकीत त्यांची गुगली टाकत स्वपक्षीयांनाच क्लिनबोल्ड केल्याचे मंगळवारी बघायला मिळाले.  

ठळक मुद्देआपली सोय आपणच करावी, पक्ष काहीही करणार नाही : अजित पवार १० जूनच्या राष्ट्रवादी काँग्रेसच्या वर्धापन दिनात छगन भुजबळ होणार सहभागी

पुणे : अजित पवार त्यांच्या रोखठोक शैलीसाठी प्रसिद्ध आहेत. पुण्यात राष्ट्रवादी काँग्रेसच्या नियोजन बैठकीत त्यांची गुगली टाकत स्वपक्षीयांनाच क्लिनबोल्ड केल्याचे मंगळवारी बघायला मिळाले.  येत्या १० जून रोजी राष्ट्रवादी काँग्रेसचा वर्धापन दिन आणि पश्चिम महाराष्ट्रातील हल्लाबोल आंदोलनाची सांगता पुण्यात एकत्रित केली जाणार आहे. या कार्यक्रमाला शरद पवार यांच्यासह राष्ट्रवादी काँग्रेसचे आघाडीचे सर्व नेते उपस्थित असणार आहेत.याच कार्यक्रमात नुकतेच जामीनावर बाहेर आलेले माजी उपमुख्यमंत्री छगन भुजबळही आपली भूमिका स्पष्ट करणार आहेत. त्यामुळे या कार्यक्रमाला महत्व प्राप्त झाले आहे. यासंबंधीची नियोजन बैठक पुण्यात पार पडली.

  या कार्यक्रमासाठी राज्यभरातून कार्यकर्ते येणार आहेत. त्यांची सोय पक्षातर्फे केली जाणार की वैयक्तिक करायची या मुद्द्यावर पवार यांनी आपली सोय आपणच करायची आहे, पक्ष काहीही करणार नाही अशा शब्दात उत्तर दिले. इतकेच नव्हे तर निवडणुकीत तिकीट मागताना चार, पाच गाड्या भरून कसे कार्यकर्ते भरून आणता, त्यांची सोय कशी होते असे विचारताच अनेकांना तो टोला बसला आणि बैठकीत खसखस पिकली.