रॉजर फेडररचा 'पॉवर पंच', नदालचा पराभव करुन झाला शांघाय ओपनचा 'चॅम्पियन'

जगातील अव्वल क्रमांकाच्या राफेल नदालला 6-4, 6-3 अशी सहज मात देत रॉजर फेडररने शांघाय मास्टर्स टेनिस स्पर्धेचे अजिंक्यपद पटकावले. फेडररचा नदालविरुध्दचा हा सलग पाचवा विजय होता.

शांघाय- जगातील अव्वल क्रमांकाच्या राफेल नदालला 6-4, 6-3 अशी सहज मात देत रॉजर फेडररने शांघाय मास्टर्स टेनिस स्पर्धेचे अजिंक्यपद पटकावले. फेडररचा नदालविरुध्दचा हा सलग पाचवा विजय होता. टेनिसमधील या आघाडीच्या दोन खेळाडूंदरम्यानचा हा 38 वा 'फेडाल' सामना होता. त्यात फेडररचा हा 15 वा विजय होता. 2014 च्या अॉस्ट्रेलियन ओपनपासून फेडरर सातत्याने नदालवर विजय मिळवत आला आहे. 

फेडररने सामन्याची सुरुवातच सर्विस ब्रेकसह दणक्यात केली आणि तोच धडाका कायम ठेवत 6-4,6-3 असा सहज विजय मिळवला. फेडररचा हा राफाविरुध्दचा पाचवा सरळ सेटमधील विजय आहे. 

फेडररचे हे दुसरे शांघाय विजेतेपद असुन कारकिर्दितील 94 वे विजेतेपद आहे. यासह त्याने इव्हान लेंडलच्या विजेतेपदांची बरोबरी केली असुन आता विजेतेपदांच्या बाबतीत केवळ जिमी कॉनर्स त्याच्यापुढे आहे. एटीपी मास्टर्स 1000 श्रेणीच्या स्पर्धांतील फेडररचा हा 350 वा विजय आहे. 

शांघाय ओपनमध्ये नदालवर त्याने आपले रेकॉर्ड 3-0 असे केले आहे. यंदा विम्बल्डननंतर फेडररने प्रथमच कोणती स्पर्धा जिंकली असली तरी यंदाचे त्याचे हे सहावे अजिंक्यपद आहे. यंदाच फेडररने अॉस्ट्रेलियन ओपन व मियामी ओपनच्या अंतिम फेरीत आणि फ्रेंच ओपनच्या चौथ्या फेरीत नदालला मात दिली होती. त्यानंतर आजच्या या विजयासह त्याने नंबर वन नदालच्या सलग 16 विजयांची मालिका खंडीत केली आहे. असे असले तरी जागतिक क्रमवारीतील अव्वल स्थान नदालकडेच कायम राहणार आहे. फेडररने याआधी 2014 मध्ये ही स्पर्धा जिःकली होती तर 2010 मध्ये तो उपविजेता होता.