प्रशांत आपटे महाराष्ट्र शरीरसौष्ठव संघटनेच्या अध्यक्षपदी

येत्या ऑक्टोबर महिन्यात पुण्यात आशियाई शरीरसौष्ठव स्पर्धेच्या आयोजनाची जबाबदारीही राज्यावरच आहे. 

मुंबई : शरीरसौष्ठवपटूंचे आश्रयदाते असलेल्या प्रशांत आपटे यांची महाराष्ट्र शरीरसौष्ठव संघटनेच्या अध्यक्षपदी एकमताने बिनविरोध निवड करण्यात आली. महाराष्ट्र राज्याच्या शरीरसौष्ठव संघटनेने गेल्या चार वर्षात तीन राष्ट्रीय स्पर्धा, जागतिक स्पर्धा तसेच अनेक देशपातळीवरच्या स्पर्धांचे भव्यदिव्य आयोजन करून राज्याने आपली ताकद अवघ्या देशाला दाखवून दिली आहे. एवढेच नव्हे तर येत्या ऑक्टोबर महिन्यात पुण्यात आशियाई शरीरसौष्ठव स्पर्धेच्या आयोजनाची जबाबदारीही राज्यावरच आहे. 

राज्य संघटनेचे अन्य पदाधिकारी कायम असून अॅड. विक्रम रोठे यांच्याकडे सरचिटणीसपदाची सुत्रे आहेत. विद्यमान संघटनेत हेमचंद्र पाटील कार्यकारी उपाध्यक्ष असून खंदे कार्यकर्ते मदन कडू कार्यकारी संचालकपदी कायम आहेत.

"फक्त खेळ आणि खेळाडूंचा विचार करणाऱ्या या राज्य संघटनेने गेल्या चार वर्षात बक्षीसापोटी पाच कोटींची उधळण केली आहे. आपले खेळाडू श्रीमंत झाले तर आपला खेळही श्रीमंत होणार, याच उद्देशाने राज्य संघटना आपले कार्य प्रामाणिकपणे करीत आली आहे आणि पुढेही करणार आहोत. व्यायाममहर्षी तळवलकरांनी केलेले कार्य पुढेही त्याच जोमाने करण्याचा प्रयत्न करू," असे आश्वासन आपटे यांनी दिले.