नवरा काळा असल्याने बायकोने झोपेतच जिवंत जाळले

बरेलीतील खुर्द फतेहगढ पोलीस ठाणेच्या हद्दीत ही घटना घडली आहे. या पोलीस ठाण्याचे प्रभारी पोलीस अधिकारी सहदेव सिंह यांनी सांगितले

लखनौ - उत्तर प्रदेशच्या बरेली जिल्ह्यात एक धक्कादायक घटना उघडकीस आली आहे. येथे पत्नीनेच आपल्या नवऱ्याला जिवंत जाळल्याची घटना घडली. विशेष म्हणजे पती काळा असल्याने पत्नीने हे टोकाचे पाऊल उचलल्याचे सांगण्यात येत आहे. या घटनेनंतर तात्काळ पतीला रुग्णालयात नेण्यात आले होते. मात्र, उपचारादरम्यान त्याचा मृत्यू झाला. याप्रकरणी पोलिसांनी महिलेला अटक केली आहे. 

बरेलीतील खुर्द फतेहगढ पोलीस ठाणेच्या हद्दीत ही घटना घडली आहे. या पोलीस ठाण्याचे प्रभारी पोलीस अधिकारी सहदेव सिंह यांनी सांगितले की, येथील 22 वर्षीय महिलेने आपल्या पतीला पेट्रोल टाकून जिवंत जाळले. घटनेनंतर तात्काळ पतीस रुग्णालयात नेण्यात आले होते, पण त्यांस मृत घोषित करण्यात आले. महिलेचे नाव प्रेमश्री असून तिला पोलिसांनी अटक केल्याचंही सिंह यांनी सांगितल. विशेष म्हणजे नवरा काळा असल्यानेच हे कृत्य करण्यात आल्याचे पत्नीनं म्हटलं आहे. 

सत्यवीर सिंह हे सोमवारी पहाटे 5 वाजता आपल्या घरातील खाटावर झोपले होते. त्याचवेळी, पत्नी प्रेमश्रीने त्यांच्या अंगावर पेट्रोल टाकून त्यांना आग लावली. यावेळी पेट्रोलचे काही थेंब प्रेमश्रीच्या पायावरही पडले. ज्यामुळे तिचे पायही भाजले आहेत. या घटनेमुळे सत्यजीतचा आवाज ऐकून बाजू-बाजुच्या परिसरातील लोकांनी घटनास्थळी धाव घेतली. त्यानंतर, सत्यवीरला रुग्णालयात दाखल केले. पण, उपचार सुरू असताना त्यांचा मृत्यू झाला. लग्नापासूनच प्रेमश्रीला सत्यवीर आवडत नसे, पतीच्या काळ्या रंगावरुन ती त्याला सातत्याने घालून-पाडून बोलत. पण, सत्यवीर तिच्यावर खूप प्रेम करत असे. त्यामुळे, आपली पत्नी असे काही करेल, याचा थोडाही अंदाज सत्यवीरल नव्हता. दरम्यान, पोलिसांनी पत्नी प्रेमश्रीविरुद्द 302 चा गुन्हा दाखल केला आहे.