Birthday Special: राहुल गांधींच्या 'या' दोन प्रेमकहाण्या राहिल्या होत्या चर्चेत

आज राहुल गांधींचा 48 वा वाढदिवस

नवी दिल्ली: काँग्रेस अध्यक्ष राहुल गांधी सध्या पुढील लोकसभा निवडणुकीच्या तयारीला लागले आहेत. विरोधकांची एकजूट करुन भाजपाला सत्तेपासून दूर राखण्यासाठी राहुल गांधींचे प्रयत्न सुरू आहेत. आज राहुल गांधी 48 वर्षांचे झाले आहेत. राहुल यांनी 34 व्या वर्षी अमेठीमधून पहिल्यांदा लोकसभेची निवडणूक लढवली. ही निवडणूक जिंकून राहुल विवाहबद्ध होतील आणि पुढील राजकारण करतील, अशी चर्चा त्यावेळी होती. मात्र अद्याप राहुल यांनी लग्न केलेलं नाही. मात्र प्रेम प्रकरणांमुळे ते दोनदा चांगलेच चर्चेत आले होते.

'संडे गार्डियन'नं 2012 मध्ये राहुल गांधींचे अफगाणिस्तानचा राजा मोहम्मद जहिर शाहची नात नोएल जेहरसोबत प्रेमसंबंध असल्याचं वृत्त दिलं होतं. यानंतर राहुल आणि नोएल दिल्लीतील अमन हॉटेलमध्ये एकत्र दिसले होते. दिल्लीशिवाय फ्रान्समध्येदेखील हे दोघे सोबत दिसले होते. नोएलनं फ्रेंच युनिव्हर्सिटीमधून युरोपियन बिझनेस विषयात पदवी घेतली होती. ती मूळची इटलीची नागरिक होती. नोएलनं वेबस्टर युनिव्हर्सिटी ऑफ लंडनमधून ज्वेलरी डिझाईनमध्ये स्पेशलायझेशनदेखील केलं होतं. नोएल धर्मांतर करुन रोमन कॅथलॅक झाल्याचं वृत्तदेखील त्यावेळी आलं होतं. राहुल गांधींची आई सोनिया गांधी यांच्या इटलीतील घरी नोएलनं पूजा केल्याची चर्चादेखील त्यावेळी होती. अफगाणिस्तानची राजकुमारी असलेल्या नोएलसोबत राहुल गांधी विवाह बंधनात अडकणार अशी शक्यता वर्तवली जात होती. मात्र 2013 मध्ये नोएलनं इजिप्तचा राजकुमार मोहम्मदसोबत विवाह केला. 

1990 च्या दशकात केंब्रिज युनिव्हर्सिटीत राहुल गांधी यांची भेट वर्निक कार्टेलीशी झाली. मात्र याची माहिती लोकांना 1998 मध्ये समजली. त्यावेळी राहुल गांधी प्रचारासाठी दिल्लीला आले होते. यानंतर वर्षभरानंतर राहुल आणि वर्निक बर्मिंगहॅगमध्ये भारत आणि इंग्लंडच्या संघातील क्रिकेट सामना पाहताना दिसले. यानंतर वर्निक आणि राहुल यांच्यात प्रेमसंबंध असल्याची चर्चा सुरू झाली. त्याच वर्षी म्हणजेच 1999 मध्ये हे दोघे अंदमानमध्ये एकत्र सुट्टी एन्जॉय करताना दिसले. वर्निका मूळची कोलंबियाची असल्याची चर्चा त्यावेळी होती. यानंतर वर्निक राहुल यांच्या कुटुंबासह लक्षद्वीप आणि केरळमध्ये दिसली. त्यावेळी माध्यमांनी तिचं नाव जॉनिटा असल्याचं वृत्त दिलं होतं.
 
2004 मध्ये 'इंडियन एक्स्प्रेस'सोबत बोलताना राहुल गांधींनी याबद्दल पहिल्यांदा भाष्य केलं. 'माझी गर्लफ्रेंड आहे. पण ना तिचं नाव जोनिटा आहे, ना ती कोलंबियाची आहे,' असं राहुल यांनी म्हटलं होतं. 'तिचं नाव वर्निका असून ती मूळची स्पॅनिश आहे. ती आर्किटेक्ट असून माझी सर्वात चांगली मैत्रीण आहे,' असं राहुल म्हणाले होते. आता हे दोघे संपर्कात आहेत का, याबद्दलची कोणतीही माहिती उपलब्ध नाही.