नवविवाहितेवर पतीचे नातेवाईक, मांत्रिकाचा सामुहिक बलात्कार

कुरुक्षेत्र येथील पोलीस ठाण्यामध्ये नवविवाहितेच्या वडीलांनी आरोपींविरोधात तक्रार नोंदविली आहे. या नविवाहितेचे लग्न 12 सप्टेंबरला यमुनानगरमधील मुलाशी झाले होते.

कुरुक्षेत्र : हरियाणातील यमुनानगरमध्ये आज धक्कादायक बाब समोर आली आहे. नव्या संसाराची स्वप्ने रंगविणाऱ्या नवविवाहितेवर सासरकडच्या नातेवाईकांनी आणि मांत्रिकाने सामुहिक बलात्कार करून तिच्या स्वप्नांची राख रांगोळी केली.

कुरुक्षेत्र येथील पोलीस ठाण्यामध्ये नवविवाहितेच्या वडीलांनी आरोपींविरोधात तक्रार नोंदविली आहे. या नविवाहितेचे लग्न 12 सप्टेंबरला यमुनानगरमधील मुलाशी झाले होते. लग्नानंतर लगेचच सासऱ्यांनी फोन करून तुमची मुलगी मानसिकदृष्ट्या वेडी असल्याचे सांगितले. जेव्हा तिचे वडील तिच्या सासरी पोहोचले तेव्हा सारसे खोटे बोलत असल्याचे आढळले. तसेच ती बेशुद्ध अवस्थेत आढळली. तिने शुद्धीवर आल्यावर वडिलांना खरा प्रकार सांगितला.

लग्नाच्या पहिल्या रात्रीच सासरकडच्यांनी मांत्रिकाला घरी बोलावले होते. त्याने तिला काहीतरी औषधी खायला दिली. त्यानंतर तिच्यासोबत पतीच्या मोठ्या भावाने आणि नणंदेच्या पतीने शरीरसंबंध ठेवण्यास भाग पाडले. 

यानंतर पुढील तीन दिवस तिला मांत्रिकाबरोबर घालवावे लागले. या काळात तिच्यावर अनेकदा सामुहिक बलात्कार करण्यात आला. या बलात्काराला तिची सासू आणि दोन नणंदांचीही फूस होती, असा आरोप नवविवाहितेच्या वडीलांनी केली आहे. 

आरोपींनी पुरावा नष्ट करण्यासाठी बलात्कारानंतर तिचे कपडे जाळून टाकले आहेत. कुरुक्षेत्र पोलीस ठाण्यात गुन्हा दाखल करण्यात आला असून चौकशीसाठी यमुनानगर पोलीस ठाण्याकडे देण्यात आले आहे.