कौमार्य म्हणजे सीलबंद बाटली; वादग्रस्त पोस्ट करणाऱ्या प्राध्यापकाची हकालपट्टी

महिलांच्या कौमार्याबद्दल वादग्रस्त पोस्ट करणाऱ्या प्रोफेसरची विद्यापीठातून हकालपट्टी करण्यात आली आहे. पश्चिम बंगालमधील प्रतिष्ठित जाधवपूर विद्यापीठातील प्राध्यापकाच्या फेसबुक पोस्टमुळे मोठा वाद निर्माण झाला होता.

ठळक मुद्देमहिलांच्या कौमार्याबद्दल वादग्रस्त पोस्ट करणाऱ्या प्रोफेसरची विद्यापीठातून हकालपट्टी करण्यात आली आहे. पश्चिम बंगालमधील प्रतिष्ठित जाधवपूर विद्यापीठातील प्राध्यापकाच्या फेसबुक पोस्टमुळे मोठा वाद निर्माण झाला होता. महिला आयोगाकडून चौकशी पूर्ण होत नाही तोपर्यंत कनक यांना विद्यापीठाच्या कॅम्पसमध्ये प्रवेशबंदी करण्यात आली आहे.

कोलकाता - महिलांच्या कौमार्याबद्दल वादग्रस्त पोस्ट करणाऱ्या प्रोफेसरची विद्यापीठातून हकालपट्टी करण्यात आली आहे. पश्चिम बंगालमधील प्रतिष्ठित जाधवपूर विद्यापीठातील प्राध्यापकाच्या फेसबुक पोस्टमुळे मोठा वाद निर्माण झाला होता. महिलांच्या कौमर्याविषयी प्राध्यापक कनक सरकार यांनी केलेल्या विधानामुळे त्यांच्यावर टीकेची झोड उठली होती. महिला आयोगाकडून चौकशी पूर्ण होत नाही तोपर्यंत कनक यांना विद्यापीठाच्या कॅम्पसमध्ये प्रवेशबंदी करण्यात आली आहे.

लग्न न झालेली मुलगी तरुणांसाठी परीप्रमाणे असते, असं सरकार यांनी त्यांच्या फेसबुक पोस्टमध्ये म्हटलं. 'मुलगी जेव्हा जन्माला येते, तेव्हा ती सील पॅक्ड असते. कुमारवयीन मुलीचा संबंध संस्कृती, मूल्य आणि लैंगिक स्वच्छतेशी असतो. कुमारी मुलगी पत्नी म्हणून मिळाल्यास होणारे फायदे मुलांना माहीत नसतात. त्यामुळे अनेक मुलं मूर्ख बनतात,' असं सरकार यांनी त्यांच्या फेसबुक पोस्टमध्ये म्हटलं होतं. 'कोल्ड्रिंकच्या बाटलीचं सील तुटलं असेल, तर तुम्ही ती खरेदी करता का?' असा प्रश्नही त्यांनी विचारला होता.

आंतरराष्ट्रीय संबंधांविषयी अभ्यास करणाऱ्या शिक्षक विद्यार्थ्यांच्या समितीने कनक सरकार यांना हटवण्याची मागणी केली होती. तसेच त्यांना विद्यापीठात येण्यापासून रोखण्यात आलं आहे. कनक सरकार यांच्या वक्तव्यामुळे विद्यापीठाची प्रतिमा मलीन झाल्याची प्रतिक्रिया कुलुगरु सुरंजन दास यांनी दिली आहे. कनक सरकार यांच्या या पोस्टवर चौफेर टीका झाली. याबद्दल एका हिंदी वृत्तवाहिनीशी बोलताना, हे माझं अभिव्यक्ती स्वातंत्र्य असून मी काहीच चुकीचं बोललो नाही, अशी प्रतिक्रिया सरकार यांनी दिली होती. मात्र त्यानंतर त्यांनी फेसबुक पोस्ट डिलीट केली आणि त्यांच्या पोस्टबद्दल स्पष्टीकरण दिलं. मी कायमच महिलांच्या अधिकारांचं समर्थन केलं आहे, असा दावा सरकार यांनी केला होता. यासाठी त्यांनी फेसबुकवरील जुन्या पोस्टचा संदर्भ दिला.