धक्कादायक ! छेडछाडीला विरोध केला म्हणून तलवारीने कापला तरुणीचा हात

विरोध केला असता आरोपी तरुणाने संतापाच्या भरात तलवारीने तरुणीचा हात कापून वेगळा केला

लखनऊ, दि. 24 - छेडछाडीला विरोध करणा-या तरुणीचा हात तलवारीने कापण्यात आल्याची धक्कादायक घटना लखनऊत घडली आहे. निघासन रोडवर बुधवारी ही घटना घडली. तरुणीने विरोध केला असता आरोपी तरुणाने संतापाच्या भरात तलवारीने तरुणीचा हात कापून वेगळा केला. यावेळी तिथे उपस्थित लोकांनी आरोपी तरुणाला बेदम मारहाण करत पोलिसांच्या हवाली केलं. तरुणीला जिल्हा रुग्णालयात उपचारासाठी दाखल करण्यात आलं होतं. नंतर तिला केजीएमयू ट्रॉमा सेंटरला पाठवण्यात आलं आहे. 

पोलिसांनी दिलेल्या माहितीनुसार, पीडित तरुणी निघासन रोडवर एका कामानिमित्त जात होती. याचवेळी रोहित चौरसिया या तरुणाने तिची छेड काढण्याचा प्रयत्न केला. तरुणीने छेडछाडीला विरोध केला असता आरोपी रोहित चौरसियाचा संताप अनावर झाला. यानंतर त्याने तरुणीचा पाठलाग करण्यास सुरुवात केली. तरुणीने तेथून पळ काढण्याचा प्रयत्न केला, मात्र रोहितने तिला गाठले आणि तलवारीने मनगटापासून हात कापून टाकला. 

यावेळी बाजारात उपस्थित जमावाने आरोपी रोहितला पकडलं आणि प्रचंड मारहाण केली. घटनेची माहिती मिळाल्यानंतर पोहोचलेल्या पोलिसांनी आरोपीला ताब्यात घेतलं. यानंतर तरुणीला जखमी अवस्थेत जिल्हा रुग्णालयात नेण्यात आलं. डॉक्टरांनी तपासणी केल्यानंतर तिला लखनऊमधील केजीएमयू रुग्णालयात नेण्याचा सल्ला दिला. पोलिसांनी गुन्हा नोंद केला असून आरोपीला अटक केली आहे. पोलिसांनी तपास सुरु केला असून, प्राथमिक तपासात मोबाईल चार्जरवरुन पीडित तरुणी आणि आरोपीमध्ये वाद झाल्याचं समोर आलं आहे. पोलीस यामागे अजून कोणतं कारण आहे का याचा तपास करत आहे. 

पीडित तरुणीवर केजीएमयू  रुग्णालयात उपचार सुरु असून हात पुन्हा जोडण्याचा प्रयत्न डॉक्टर करत आहेत. तरुणीच्या दुस-या हातालाही जखमा झाल्या आहेत. डोक्यालाही गंभीर इजा झाली आहे. डॉक्टरांनी रात्रीच तरुणीचा हात पुन्हा एकदा जोडण्यासाठी सर्जरी सुरु केला आहे. प्लास्टिक सर्जरी विभागाचे प्रमुख ए के सिंह यांनी तरुणीचाय हात पुन्हा पुर्ववत करण्यासाठी शक्य ते सर्व प्रयत्न केले जात असल्याचं सांगितलं आहे.