Budget 2018 : इतिहासात पहिल्यांदाच सादर होणार हिंदीतून अर्थसंकल्प, अरूण जेटली ठरणार पहिले अर्थमंत्री

अर्थसंकल्पात कोणकोणत्या घोषणा ते करणार आहेत, यावर सर्वांची नजर आहे. त्यामुळे या अर्थसंकल्पाबद्दल उत्सुकता आहे. 

नवी दिल्ली - केंद्रीय अर्थमंत्री अरुण जेटली आज संसदेत अर्थसंकल्प मांडणार आहेत. सलग पाचव्यांदा ते अर्थसंकल्प मांडत आहेत.  केवळ देशच नाही तर संपूर्ण जगाचं लक्ष अरुण जेटली यांच्यावर आहे. अर्थसंकल्पात कोणकोणत्या घोषणा ते करणार आहेत, यावर सर्वांची नजर आहे. त्यामुळे या अर्थसंकल्पाबद्दल उत्सुकता आहे.  आज सकाळी 11 वाजता प्रतीक्षित असा केंद्रीय अर्थसंकल्प अरूण जेटली सादर करणार असून जेटली हे हिंदीमधून बोलतील अशी चर्चा आहे. तसे झाले तर बजेट हिंदीमधून सादर करणारे अरूण जेटली हे भारताचे पहिले अर्थमंत्री ठरणार आहेत. आत्तापर्यंत सादर झालेले सगळे केंद्रीय अर्थसंकल्प इंग्रजीतून मांडण्यात आले होते. देशभरातील बहुसंख्य राज्यांमधील ग्रामीण भागातील जनतेशी थेट संवाद व्हावा यासाठी जेटली हिंदीतून बोलणार असल्याची चर्चा आहे.

आगामी काही दिवसांमध्ये आठ राज्यांमध्ये निवडणुका होणार आहेत. तसेच वर्षभरानं लोकसभेच्या निवडणुका आहेत, त्यामुळे संपूर्ण असं हे शेवटचं बजेट असेल. त्यामुळेच हे बजेट ग्रामीण भारतासाठी असेल असं बोललं जातंय. त्यामुळेच ग्रामीण भारताला ते नीट समजावं, त्यांच्या अर्थमंत्र्यांचा थेट संवाद व्हावा यासाठी अर्थसंकल्प हिंदीतून मांडण्यात येईल आणि आत्तापर्यंतचा इंग्रजीतून बजेट मांडण्याचा पायंडा जेटली मोडतील असं मानलं जात आहे. 

मंदावलेली अर्थव्यवस्था, वित्तीय तुटीचा सामना, ग्रामीण भागात असलेली नाराजी, रोजगार आणि कृषी क्षेत्राची परवड अशा अनेक समस्या देशाला घेरलेल्या असून जेटली कुणाचं किती समाधान करतात याकडे सगळ्यांचं लक्ष आहे. हे बजेट ग्रामीण भारताला सुखावणारं असेल असा अंदाज आहे. सकाळी 11 वाजता अर्थसंकल्प सादर व्हायला सुरूवात होणार आहे. अर्थमंत्र्यांचा लाइव्ह इंटरव्ह्यू 2 वाजता आहे, अरूण जेटली 4 वाजता पत्रकार परिषद घेणार आहेत तर संध्याकाळी 7 वाजता आस्क युवर एफएम हा टॉकॅथॉन कार्यक्रम होणार आहे.  

असा असणार केंद्रीय अर्थमंत्री अरुण जेटली यांचा आजचा कार्यक्रम 

•  केंद्रीय अर्थमंत्री अरुण जेटली आज सकाळी 9 वाजता अर्थमंत्रालयात पोहोचलतील. येथे मंत्रालयातील अधिका-यांसोबत ते चर्चा करुन ते राष्ट्रपती भवनाकडे रवाना होतील. 

•  राष्ट्रपती भवनात दाखल झाल्यानंतर ते राष्ट्रपती रामनाथ कोविंद यांची भेट घेतली. येथे ते अर्थसंकल्पाच्या प्रतवर राष्ट्रपती यांची स्वाक्षरी घेतील. यानंतर ते थेट संसदेच्या दिशेनं रवाना होतील. 
•  अरुण जेटली संसदेत पोहोचेपर्यंत अर्थसंकल्पाच्या प्रतदेखील कडेकोट सुरक्षा व्यवस्थेत संसदेत पोहोचवल्या जातील. सखोल चौकशी-तपासणीनंतर या प्रत संसदेत नेल्या जातील.
• अरुण जेटली सकाळी 10 वाजता संसदेत पोहोचतील.  
•  संसदेत दाखल झाल्यानंतर अर्थमंत्री कॅबिनेट बैठकीत सहभागी होतील.
• यावेळी कॅबिनेटमध्ये अर्थसंकल्प दाखवला जाईल व कॅबिनेटकडून त्यास मंजुरी मिळेल.  
• कॅबिनेटकडून मंजुरी मिळाल्यानंतर सकाळी 11 वाजता लोकसभेत अर्थसंकल्प मांडण्यास सुरुवात होईल. 
• दीड ते दोन तास अर्थसंकल्प मांडला जाईल. मात्र अर्थसंकल्प मांडण्यास लागणार कालावधी पूर्णतः अरुण जेटली यांच्या अवलंबून आहे.  
•  दुपारी 1 वाजण्याच्या सुमारास अर्थसंकल्प पूर्णतः मांडून होईल.
• अर्थसंकल्प मांडून झाल्यानंतर पत्रकार परिषदेचे आयोजन
• 4 वाजण्याच्या सुमारास अरुण जेटली पत्रकार परिषद घेतील. 
•  पत्रकार परिषदेत अरुण जेटली अर्थसंकल्पावर आपली प्रतिक्रिया व्यक्त करतील.
• पंतप्रधान नरेंद्र मोदी यांच्यासहीत भाजपा व सरकारमधील अन्य नेते अर्थसंकल्पाबाबत आपापल्या प्रतिक्रिया व्यक्त करतील.